તમારા સંતાનોને સાચવજો...અમદાવાદમાં રમકડાંની આડમાં ઝડપાયેલો 3.84 કરોડ રૂપિયાનો હાઇબ્રિડ ગાંજો વિદ્યાર્થીઓએ મંગાવ્યો હતો

Published By
gujaratpost.in
2024-06-22 21:33:28

અમદાવાદઃ ફરીથી અમદાવાદમાંથી હાઇબ્રિડ ગાંજો ઝડપી લેવામાં આવ્યો છે, અમેરિકાથી 58 પાર્સલમાં આવેલાં હાઇબ્રિડ ગાંજાની કિંમત 3.84 કરોડ રૂપિયા જેટલી થાય છે. જે ગાંજો ધોરણ-10 અને 12 ના વિદ્યાર્થીઓએ મંગાવ્યો હોવાનો ઘટસ્ફોટ થયો છે.

વિદેશ પોસ્ટ ઓફિસમાં ક્રાઇમ બ્રાન્ચે તપાસ કરી તો આ પાર્સલ અમેરિકાથી આવ્યાં હોવાનું સામે આવ્યું હતુ.જેમાંથી રમકડાની આડમાં લિક્વિડ ડ્રગ્સ પણ મળી આવ્યું છે. આ ઓર્ડર ડાર્કવેબ પર આપવામાં આવ્યો હોવાની શક્યતા છે.

ક્રાઇમ બ્રાન્ચે તપાસ કરી તો પાર્સલમાં ડાઇપર, બાળકોના નાના મોજા, રમકડામાં આ નશાનો સામાન છુપાવીને લાવવામાં આવ્યો હતો. અગાઉ પણ આવી જ રીતે ડ્રગ્સ ભારત લાવવામાં આવ્યું હતું અને ફરીથી કરોડો રૂપિયાનો આ જથ્થો ઝડપી પાડવામાં આવ્યો છે, અહીં ચિંતાજનક વાત એ છે કે ધોરણ-10 અને 12 માં અભ્યાસ કરતા વિદ્યાર્થીઓ નશાના રવાડે ચઢ્યાં છે, તેમને આ જથ્થો મંગાવ્યો હોવાનું સામે આવ્યું છે, ત્યારે વાલીઓએ પણ તેમના સંતાનોનું ધ્યાન રાખવું જોઇએ, અમદાવાદમાં ડ્રગ્સનો મોટો જથ્થો વારંવાર આવી રહ્યો છે.