બિહારના મધુબની જિલ્લામાં બસ પલટી જતાં ગુજરાતી મહિલાનું મોત, 30 ઘાયલ- Gujarat Post

Published By
gujaratpost.in
2023-06-04 10:56:36

પટનાઃ બિહારના મધુબની જિલ્લાના ફુલપારસ પોલીસ સ્ટેશન વિસ્તારમાં રવિવારે સવારે એક અકસ્માત સર્જાયો હતો. કિસ્નીપટ્ટી કેનાલ પાસે નેશનલ હાઈવે 57 પર રવિવારે વહેલી સવારે બસ પલટી ગઈ હતી. અકસ્માતમાં એક મહિલાનું મોત થયું હતું, લગભગ 30 મુસાફરો ઘાયલ થયા હતા. તમામ ઘાયલોને સબ ડિવિઝનલ હોસ્પિટલમાં સારવાર આપવામાં આવી રહી છે.

મળતી માહિતી મુજબ બસ દુર્ઘટનાનું કારણ ડ્રાઈવરની નિંદ્રા હોવાનું કહેવાય છે. બસમાં લગભગ 40 લોકો સવાર હતા, જેઓ સિલીગુડીથી ગયા જઈ રહ્યાં હતા. મૃતકની ઓળખ ગુજરાતના વડોદરાના રહેવાસી તનુભાઈ પટેલની પત્ની હંસા દેવી (65) તરીકે થઈ છે.

અકસ્માત બાદ ઘટના સ્થળે અફરા-તફરી મચી ગઈ હતી. મુસાફરોની ચીસો સાંભળીને સ્થાનિક લોકો ઘટનાસ્થળે પહોંચી ગયા હતા અને બચાવ કામગીરી શરૂ કરી હતી .પોલીસે પણ મુસાફરોને બસમાંથી બહાર કાઢ્યા અને તેમને તાત્કાલિક સબ-ડિવિઝનલ હોસ્પિટલમાં દાખલ કર્યા, જ્યાં ઘાયલોની સારવાર ચાલી રહી છે. ઘટના કેવી રીતે બની તે અંગે પોલીસે ડ્રાઇવરની પૂછપરછ શરૂ કરી છે.