ગુજરાતમાં ISIS જેવા મોડ્યુલનો પર્દાફાશ, ATSએ પોરબંદરમાંથી આતંકી સંગઠન સાથે સંકળાયેલા લોકોની કરી ધરપકડ

Published By
gujaratpost.in
2023-06-10 11:16:25

પોરબંદરઃ ગુજરાતમાંથી ફરી એકવાર આતંકી સંગઠન સાથે સંકળાયેલા લોકો પકડાયા છે. ગુજરાત એટીએસે બે દિવસથી પોરબંદરમાં ધામા નાખ્યાં હતા. જેમાં અત્યાર સુધીમાં આતંકી સંગઠન સાથે સાંઠગાંઠ ધરાવતાં 4 લોકોની ધરપકડ કરી છે. જેમાં સુરતથી એક મહિલા, પોરબંદમાંથી બે અને શ્રીનગરના એક વ્યક્તિની ધરપકડ કરી છે.

ધરપકડ કરાયેલા ચાર લોકો ISKPના સક્રિય જૂથના સભ્યો છે. ગુજરાત ATSને દરોડા દરમિયાન કેટલીય પ્રતિબંધિત વસ્તુઓ મળી આવી છે. ચારેય ISKPમાં જોડાવા માટે ભાગવાનો પ્રયાસ કરી રહ્યાં હતા. આ તમામ છેલ્લા એક વર્ષથી એકબીજાના સંપર્કમાં હતા અને સરહદ પારથી તેમના માસ્ટરના કહેવાથી કટ્ટરપંથી બન્યા હતા. સુમેરા નામની મહિલા સુરતમાં તેના પિતાને મળવા આવી હતી. સુમેરા બે સંતાનોની માતા છે. મહિલાના દક્ષિણ ભારતમાં લગ્ન થયા છે.એટીએસ દ્વારા અટકાયતમાં લેવામાં આવેલી મહિલાના તમિલનાડુમાં લગ્ન થયા છે. આ મહિલાની ઈરાન થઈ અફઘાન જવાની યોજના હતી. પકડાયેલા લોકો દેશમાં કઈ જગ્યાએ હુમલો કરવાની ફિરાકમાં હતા, તેની સાથે કોણ કોણ સંકળાયેલું છે તે પૂછપરછ દરમિયાન સામે આવી શકે છે.