Fact Check: ટોચના કમાન્ડરના મોત પર હિઝબુલ્લાહ ચીફ નસરુલ્લાહ રડી પડ્યાં હોવાનો દાવો ? જાણો વાયરલ વીડિયોનું સત્ય

Gujaratpost fact check: છેલ્લા એક સપ્તાહમાં લેબનોનમાં ઈઝરાયેલના હવાઈ હુમલામાં લગભગ 1000 લોકોનાં મોતનો દાવો છે. મૃતકોમાં બાળકો અને મહિલાઓ પણ સામેલ છે. ઈઝરાયેલનું કહેવું છે કે તે હિઝબુલ્લાહ લડવૈયાઓ અને તેના સૈન્ય મથકોને નિશાન બનાવી રહ્યું છે. ઇઝરાયેલના પીએમએ લેબનોનના લોકોને હસન નસરુલ્લાહના ચુંગાલમાંથી બહાર નીકળવાની અપીલ કરી છે. જે હિઝબુલ્લાહના ચીફ છે. ઈઝરાયેલના પીએમ નૈતન્યાહુએ એક વીડિયો સંદેશ જારી કરીને કહ્યું હતું કે તેમના દેશની લડાઈ લેબનીઝ નાગરિકો સાથે નથી, પરંતુ હિઝબુલ્લાહ વિરુદ્ધ છે. હવે નસરુલ્લાહનો એક વીડિયો સોશિયલ મીડિયા પર વાયરલ થયો છે, જેમાં તે રડતા જોવા મળી રહ્યાં છે.

એવો દાવો કરવામાં આવી રહ્યો છે કે લેબનોન પર તાજેતરના હુમલામાં પોતાના ટોચના કમાન્ડર મોહમ્મદ કબિસીને ગુમાવ્યાં બાદ નસરુલ્લા ખૂબ જ રડવા લાગ્યા હતા. જોકે, જ્યારે ગુજરાત પોસ્ટે આ દાવાને તપાસ્યો ત્યારે તે સંપૂર્ણ રીતે ખોટો સાબિત થયો હતો. આ વીડિયોને લેબનોનમાં ઈઝરાયેલના હુમલા સાથે કોઈ લેવાદેવા નથી. નસરુલ્લાહનો આ વીડિયો 2 વર્ષથી વધુ જૂનો છે.

શું દાવો કરવામાં આવ્યો હતો ?

લોકો નસરુલ્લાનો વીડિયો અલગ-અલગ સોશિયલ મીડિયા પ્લેટફોર્મ પર શેર કરી રહ્યાં છે અને દાવો કરી રહ્યાં છે કે કમાન્ડર મોહમ્મદ કબિસીની હત્યા બાદ તે જોર જોરથી રડી રહ્યાં છે. સોશિયલ મીડિયા યુઝરે વીડિયો શેર કર્યો અને લખ્યું કે એક દિવસ પોતાના કૃત્યની સજા ભોગવવી પડશે ! આ કટ્ટરવાદી મુસ્લિમને સારી રીતે જુઓ !

આ છે હિઝબુલ્લાહ આતંકવાદી સંગઠનનો કમાન્ડર નસરુલ્લાહ. ઑક્ટોબર 1947માં જ્યારે ઈઝરાયેલી લોકો માર્યા ગયા ત્યારે તે જોરથી હસી રહ્યાં હતા ! આજે જ્યારે હિઝબુલ્લાહના આતંકવાદીઓ માર્યા ગયા ત્યારે તે રડી રહ્યાં છે. આજે તે પોતાના લોકોના જીવન માટે ભીખ માંગી રહ્યાં છે. ઘણા લોકોએ ફેસબુક અને X પર સમાન કેપ્શન સાથે વીડિયો શેર કર્યો છે.

Gujaratpost fact check એ તપાસ કરી

આ વીડિયો સોશિયલ મીડિયા પર ખૂબ જ ઝડપથી વાયરલ થઈ રહ્યો હતો, તેથી અમે આ દાવાની તપાસ કરવાનું નક્કી કર્યું. સૌ પ્રથમ અમે ગુગલ ઓપન સર્ચની મદદથી વિવિધ વેબસાઇટ્સ અને સોશિયલ મીડિયા પ્લેટફોર્મ પર સર્ચ કર્યું. આ સમય દરમિયાન અમને ઘણા મીડિયા રિપોર્ટ્સ મળ્યાં, જેમાં વીડિયોના સ્ક્રીનશોટનો ઉપયોગ કરવામાં આવ્યો છે. વીડિયોની સત્યતા જાણવા માટે, અમે રિવર્સ સર્ચ કર્યું અને એક ફેસબુક એકાઉન્ટ મળ્યું જેના પર 12 ઓગસ્ટ, 2022ના રોજ વાયરલ વીડિયો અપલોડ કરવામાં આવ્યો હતો. તેનાથી સ્પષ્ટ થાય છે કે વીડિયો તાજેતરનો નથી પરંતુ 2 વર્ષ જૂનો છે.

અમને યુટ્યુબ પર વાયરલ ક્લિપ સંબંધિત ઘણા વીડિયો પણ મળ્યાં. વાયરલ ક્લિપ બે વર્ષ પહેલા મોઆમેલ અલ-મકદિસી નામની યુટ્યુબ ચેનલ પર અપલોડ કરવામાં આવી હતી. અહીંથી પ્રાપ્ત માહિતી અનુસાર, નસરુલ્લાહ પયગંબર મોહમ્મદ સાહેબના પૌત્ર ઈમામ હુસૈનની શહાદતને યાદ કરીને રડી રહ્યાં હતા.

હકીકત તપાસમાં શું બહાર આવ્યું ?

તપાસ દરમિયાન વાયરલ વીડિયો સાથે કરવામાં આવેલો દાવો ખોટો હોવાનું જાણવા મળ્યું હતું. ગુજરાત પોસ્ટના ફેક્ટ ચેકમાં જાણવા મળ્યું છે કે નસરુલ્લાહનો રડતો એક જૂનો વીડિયો શેર કરવામાં આવી રહ્યો છે જે તેને લેબનોન પરના વર્તમાન હુમલા સાથે જોડે છે. આ વીડિયો નકલી દાવા સાથે શેર કરવામાં આવી રહ્યો છે, તેથી, લોકોને આવી કોઈપણ નકલી પોસ્ટથી સાવચેત રહેવાની સલાહ આપવામાં આવે છે.

અમારી મોબાઇલ એપ ડાઉનલોડ કરોઃ

Android મોબાઇલ માટેઃ https://play.google.com/store/apps/details?id=com.gujaratpost.app

iOS મોબાઇલ માટેઃ https://apps.apple.com/in/app/gujarat-post/id6475000526