વાવાઝોડા બાદ હજુ ગુજરાતમાં બે દિવસ ભારેથી અતિભારે વરસાદની આગાહી- Gujarat Post

Published By
gujaratpost.in
2023-06-18 12:06:03

અમદાવાદઃ રાજ્યમાંથી બિપરજોય વાવાઝોડું પસાર થઈ ગયા બાદ તબાહીની તસવીરો સામે આવી રહી છે. વાવાઝોડા બાદ ભારે વરસાદ પડી રહ્યો છે. હવામાન વિભાગના જણાવ્યાં મુજબ, બે દિવસ રાજ્યમાં ભારેથી અતિભારે વરસાદની સંભાવના છે. આજની આગાહી પ્રમાણે, સાબરકાંઠા, અમદાવાદ, બનાસકાંઠા, અરવલ્લી, ગાંધીનગર, મહિસાગર, ડાંગ, તાપી, વલસાડ, ગીર સોમનાથ અને જૂનાગઢમાં ભારેથી અતિભારે વરસાદ પડશે. જ્યારે આવતીકાલે ઉત્તર ગુજરાત, દક્ષિણ ગુજરાત અને સૌરાષ્ટ્રમાં વરસાદ પડશે. અમદાવાદમાં પણ વરસાદ પડી શકે છે.

છેલ્લા 24 કલાકમાં રાજ્યના 22 જિલ્લાના 109 તાલુકાઓમાં વરસાદ નોંધાયો છે. જેમાં સૌથી વધુ બનાસકાંઠામાં અમીરગઢમાં 8 ઈંચ, દાંતા અને ધાનેરા તાલુકામાં 7-7 ઈંચ વરસાદ પડ્યો છે. વાવાઝોડા બાદ બનાસકાંઠા જિલ્લામાં સતત ધોધમાર વરસાદ ખાબકતા જિલ્લામાં જળબંબાકારની સ્થિતિ સર્જાઈ છે. ખેતરોમાં ઢીંચણ સમા પાણી ભરાયા છે. ધોધમાર વરસાદને કારણે બનાસકાંઠા જિલ્લાના અનેક ગામો સંપર્ક વિહોણા બન્યાં છે.

બનાસકાંઠામાં ભારે વરસાદને કારણે કાર પાણીમાં ફસાઈ જતાં NDRF દ્વારા રેસક્યું ઓપરેશન હાથ ધરાયું હતું. NDRF દ્વારા 4 લોકોનું રેસક્યું કરવામાં આવ્યું હતું. હજુ પણ એક લાપતા વ્યક્તિની શોધખોળ કરવામાં આવી રહી છે. રેસ્ક્યુ કરાયેલા લોકો રાજસ્થાનના જાલોરના વતની હોવાનું સામે આવ્યું છે.