ગ્રીષ્મા હત્યા કેસઃ આરોપીનો બિઝનેસ જાણીને તમે ચોંકી જશો, યુવતીના માતા-પિતાને હત્યાની જાણ થતાં બેભાન થઈને ઢળી પડ્યાં- Gujarat Post

Published By
gujaratpost.in
2022-02-15 08:56:09

(ગ્રીષ્માનો હત્યારો ફેનિલ ગોયાણી)

ગ્રીષ્માની અંતિમ યાત્રાને લઈ પોલીસનો ચુસ્ત બંદોબસ્ત

સમાજના આગેવાનોએ પરિવારને ન્યાય અપાવવા આગળ આવ્યાં

સુરતઃ કામરેજ તાલુકાના પાસોદરા ખાતે એક તરફી પ્રેમમાં પાગલ ફેનિલ ગોયાણી નામના યુવકે ગ્રીષ્મા વેકરિયા નામની યુવતીની જાહેરમાં છરાના ઘા મારી હત્યા કરી નાખી.આ ઘટનાના ઘેરા પ્રત્યાઘાત પડ્યા છે, સમાજના આગેવાનો દીકરીના પરિવારને ન્યાય અપાવવા આગળ આવ્યાં છે, ગ્રીષ્માના પિતા વિદેશની પરત ફર્યાં હોવાથી આજે દિકરીની અંતિમવિધિ કરવામાં આવશે. તેના માતા-પિતાને આજે સવારે જ વ્હાલસોયીની હત્યા થઈ હોવાની જાણ કરવામાં આવતાં તેઓ બેભાન થઈને ઢળી પડ્યા. અંતિમ યાત્રાને લઈને સોસાયટીની આસપાસ પોલીસનો ચુસ્ત બંદોબસ્ત કરવામાં આવ્યો છે.

કેસ જેમ આગળ વધી રહ્યો છે તેમ હત્યારા ફેનિલ અંગે ચોંકાવનારી માહિતી સામે આવી રહી છે. આરોપી સ્મોકિંગ ઝોન અને કપલ બોક્સ ચલાવતો હોવાનું બહાર આવ્યું છે. એક તરફી પ્રેમમાં હત્યા કરનારો ફેનિલ ડ્રગ્સના રવાડે ચઢી ગયો હોવાની આશંકા છે. સુરતના વરાછા, યોગીચોક, સરથાણા, કતારગામ, પુણા વિસ્તારમાં યુવાનો ડ્રગ્સ જેવા માદક પદાર્થોનું સેવન કરતા હોવાની વાત સામે આવી રહી છે. આ વિસ્તારોમાં 400 જેટલા કપલબોક્સ તંત્રની રહેમનજર હેઠળ ધમધમી રહ્યાં છે.

પાસોદરાના ચકચારી હત્યા પ્રકરણમાં તટસ્થ તપાસની માંગ સાથે વિવિધ સંસ્થાઓ દ્વારા પોલીસ કમિશનર, જિલ્લા કલેકટરને આવેદન પત્ર આપીને તપાસ પ્રક્રિયા ઝડપી બનાવવાની માંગ કરવામાં આવી છે.