અમેરિકામાં 6 વર્ષના ટાબરિયાએ શિક્ષિકાને મારી દીધી ગોળી, ધોરણ-1 માં કરે છે અભ્યાસ

Published By
gujaratpost.in
2023-01-07 11:50:17

વોશિંગ્ટનઃ અમેરિકાના વર્જિનિયાની એક સ્કૂલમાં છ વર્ષના બાળકે પોતાની 30 વર્ષની શિક્ષિકાને ગોળી મારી દીધી હતી. હાલ ઘાયલ શિક્ષિકાને હોસ્પિટલમાં દાખલ કરવામાં આવ્યાં છે. અને બાળકને પોલીસ કસ્ટડીમાં લેવામાં આવ્યું છે.

ચીફ સ્ટીવ ડ્રૂએ જણાવ્યું હતું કે ન્યૂપોર્ટ ન્યૂઝ સિટીની રિચનેક એલિમેન્ટરી સ્કૂલમાં સ્થાનિક સમય મુજબ બપોરે 2 વાગ્યાની આસપાસ ફાયરિંગ થયું હતું. બાળકને બંદૂક કેવી રીતે મળી તે સ્પષ્ટ થયું નથી,આ ઘટના આકસ્મિક શૂટિંગ ન હતી. ગોળી વાગવાને કારણે શિક્ષિકાને ઇજાઓ થઈ છે, તેમની હાલત ગંભીર છે.આ ફાયરિંગમાં અન્ય કોઈ બાળકને ઈજા થઈ નથી.

ફાયરિંગની આ ઘટનામાં હોસ્પિટલમાં દાખલ શિક્ષિકાને જીવલેણ ઈજાઓ પહોંચી છે, જ્યાં ડોક્ટરો તેમને બચાવવા માટે તમામ પ્રયાસો કરી રહ્યાં છે. પોલીસના જણાવ્યા પ્રમાણે શિક્ષિકાએ ઠપકો આપ્યાં બાદ ધોરણ-1માં હાજર બાળકે તેમના પર ફાયરિંગ કર્યું હતું. અધિકારીઓએ આ ઘટનામાં વપરાયેલા હથિયાર જપ્ત કર્યું છે.

વર્જિનિયાના ગવર્નર ગ્લેન યંગકિને જણાવ્યું હતું કે તેમણે સ્થાનિક સત્તાવાળાઓને સહાયની જાહેરાત કરી હતી અને શક્ય તમામ મદદ કરવા તૈયાર છે. તેમણે ટ્વિટર પર લખ્યું કે હું સ્થિતિ પર નજર રાખી રહ્યો છું, ન્યૂટન ન્યૂઝ લગભગ 1,80,000 લોકોનું શહેર છે અને તે રાજ્યની રાજધાની રિચમન્ડથી લગભગ 112 કિ.મી દક્ષિણમાં આવેલું છે.