નવી દિલ્હીઃ SIR મામલો અને CEC જ્ઞાનેશ કુમારના રાજીનામાની માંગણી કરતા કોકરોચ જનતા પાર્ટી (CJP) ના સમર્થકો સામે પોલીસ કાર્યવાહી કરી રહી છે. દિલ્હીના વિવિધ વિસ્તારોમાં CJP સમર્થકોની અટકાયત કરવામાં આવી રહી છે. અત્યાર સુધીમાં 1,500 થી વધુ પ્રદર્શનકારીઓની અટકાયત કરવામાં આવી છે. કનોટ પ્લેસ આઉટર સર્કલ પર ભેગા થયેલા લગભગ 200 CJP સમર્થકોની અટકાયત કરવામાં આવી હતી, જે બધા જ જંતર-મંતર તરફ જવાનો પ્રયાસ કરી રહ્યાં હતા. પોલીસે CJP નેતાઓ અભિજીત દિપકે, આશુતોષ રંકા અને સૌરભ દાસને એરપોર્ટ પરથી અટકાયતમાં લીધા હતા.
જંતર- મંતર તરફ જતા તમામ રસ્તાઓ પર બેરિકેડ લગાવવામાં આવ્યાં છે. 30,000 થી વધુ પોલીસ અને અર્ધલશ્કરી કર્મચારીઓ તૈનાત છે. સીસીટીવી અને ડ્રોન સર્વેલન્સ હાથ ધરવામાં આવી રહ્યું છે, અને વાહનોને પ્રવેશતા અટકાવવા માટે રસ્તાઓ પર સ્પાઇક્સ મૂકવામાં આવ્યાં છે. દિલ્હીની તમામ સરહદો પર પોલીસ અને સીમા સુરક્ષા દળ તૈનાત છે. દિલ્હીમાં પ્રવેશતા વાહનોની તપાસ કરવામાં આવી રહી છે. જંતર- મંતરની 4 કિલોમીટરની ત્રિજ્યામાં ઇન્ટરનેટ સેવાઓ સ્થગિત કરવામાં આવી છે. 45 મેટ્રો સ્ટેશનો પર પ્રવેશ અને બહાર નીકળવાની સુવિધાઓ બંધ છે.
ઈમરાન ખાન અને તુષાર ગાંધીને મુંબઈમાં અટકાયતમાં લેવામાં આવ્યાં છે. ઈમરાન ખાન મુંબઈના ઓગસ્ટ ક્રાંતિ મેદાનમાં યોજાઈ રહેલા વિરોધ પ્રદર્શનમાં ભાગ લેવા પહોંચ્યાં હતા.
ભાજપ સાંસદ રવિશંકર પ્રસાદે કહ્યુ કે, કેજરીવાલે દાંડી માર્ચનો ઉલ્લેખ કર્યો હતો - તે એક મોટી વાત હતી. તેઓ દારૂ કૌભાંડમાં ફસાઈ ગયા હતા, ખરું ને ? કેસ હજુ પણ ચાલુ છે. તો, કેજરીવાલ, કૃપા કરીને તમારા આંદોલનની સરખામણી દાંડી માર્ચ સાથે કરીને ગાંધીજીની ભાવનાને ઠેસ ન પહોંચાડો.. હું ફક્ત એક વાત પૂછવા માંગુ છું, તેમના બધા (અરવિંદ કેજરીવાલના) સાથીઓએ તેમને કેમ છોડી દીધા ? અન્ના આંદોલન દરમિયાન જેઓ તેમની સાથે હતા - તેમણે તે બધાને પાછળ છોડી દીધા, અને તેઓ બધા એક પછી એક ચાલ્યાં ગયા..
















