- ભાવનગરથી કોઈને કહ્યાં વગર આવ્યો હતો વડોદરા
- પોલીસે સ્વિચ ઓફ મોબાઈલ કબ્જે કરી તપાસ હાથ ધરી
વડોદરા: શહેરમાં ન્યાય મંદિર વિસ્તારમાં આવેલી ગીતા હોટલના ત્રીજા માળેથી કૂદીને ભાવનગરના 25 વર્ષીય યુવકે આપઘાત કરી લેતા ચકચાર મચી છે. મૃતક યુવક પોતાના પરિવારનો એકનો એક દીકરો હતો. ઘટના સ્થળેથી મળેલી સ્યૂસાઇડ નોટમાં માનસિક તણાવના કારણે આ પગલું ભર્યું હોવાનો ઉલ્લેખ છે.
પ્રાપ્ત વિગતો અનુસાર, ભાવનગર ખાતે રહેતો હેમલ ડાભી 24 સપ્ટેમ્બરના રોજ સાંજે આશરે 4 વાગ્યાની આસપાસ પરિવારને જાણ કર્યા વિના વડોદરા આવ્યો હતો. તેણે ન્યાય મંદિર પાસે આવેલી ગીતા હોટલમાં રૂમ નંબર 306 ભાડે રાખ્યો હતો. રાત્રે બહારથી મંચુરિયન મંગાવીને જમ્યા બાદ તે પોતાના રૂમમાં ગયો હતો. મોડી રાત્રે આશરે 2 વાગ્યાની આસપાસ હેમલે હોટલના ત્રીજા માળેથી નીચે ઝંપલાવ્યું હતું.
ઘટનાની જાણ થતાં જ હોટલ સ્ટાફે તાત્કાલિક 108 એમ્બ્યુલન્સને જાણ કરી હતી. 108 ની ટીમે સ્થળ પર પહોંચી તપાસ કરતા હેમલનું ઘટના સ્થળે મોત નીપજ્યું હોવાનું જાહેર કર્યું હતું. બનાવ અંગે જાણ થતાં સીટી પોલીસની ટીમ ઘટના સ્થળે દોડી આવી હતી અને પંચનામું કરી મૃતદેહને પોસ્ટમોર્ટમ અર્થે એસએસજી હોસ્પિટલ ખાતે ખસેડ્યો હતો.

















