3 બાળકોના મોત અને વર્તમાન પરિસ્થિતિ
આરોગ્ય મંત્રીના જણાવ્યાં અનુસાર, અત્યાર સુધીમાં વાયરસનો ચેપ લાગ્યો હોય તેવા કુલ 3 બાળકોનાં મોત થયાં છે. આ બાળકોમાંથી બે વડોદરા અને ગોધરા વિસ્તારના હતા, જ્યારે એક બાળક રાજસ્થાનનું હતું અને તેને સારવાર માટે હિંમતનગરની સિવિલ હોસ્પિટલમાં દાખલ કરવામાં આવ્યું હતું. હાલમાં, વિસનગરના એક બાળકનો રિપોર્ટ પોઝિટિવ આવ્યો છે અને તેની વડનગર હોસ્પિટલમાં સારવાર ચાલી રહી છે. આરોગ્ય વિભાગ શંકાસ્પદ દર્દીઓની સતત તપાસ કરી રહ્યું છે.
સેન્ડફ્લાય દ્વારા ફેલાતો ચેપ
પ્રાથમિક તપાસમાં જાણવા મળ્યું છે કે આ વાયરસ સેન્ડફ્લાય દ્વારા ફેલાય છે. જે વિસ્તારોમાં દર્દીઓ મળી આવ્યાં છે ત્યાં આ માખીઓની સક્રિયતા જોવા મળી છે. આરોગ્ય મંત્રીએ અધિકારીઓને નિર્દેશ આપ્યો છે કે તેઓ સર્વેક્ષણ કરે અને 2024 માં આ વાયરસના કેસો નોંધાયા હોય તેવા તમામ 61 સ્થળોએ જંતુનાશક દવાઓનો છંટકાવ સુનિશ્ચિત કરે.
સારવાર અને નિવારક પગલાં
ચાંદીપુરા વાયરસ માટે કોઈ ચોક્કસ રસી કે દવા ઉપલબ્ધ નથી. ડોક્ટરો દર્દીના લક્ષણોના આધારે સહાયક સારવાર (સપોર્ટિવ કેર) આપી રહ્યા છે. મંત્રીએ વાલીઓને અપીલ કરી છે કે તેઓ ગભરાય નહીં પરંતુ સાવચેતી રાખે. જો બાળકને તાવ આવે અથવા અન્ય કોઈ લક્ષણો દેખાય, તો તેને તાત્કાલિક નજીકની સરકારી હોસ્પિટલ, PHC (પ્રાથમિક આરોગ્ય કેન્દ્ર) અથવા CHC (સામુદાયિક આરોગ્ય કેન્દ્ર) ખાતે લઈ જવું જોઈએ.
અફવાઓ પર ધ્યાન ન આપવાની અપીલ
આરોગ્ય વિભાગે લોકોને સોશિયલ મીડિયા પરની અફવાઓથી દૂર રહેવાની સલાહ આપી છે. લોકોને ફક્ત આરોગ્ય વિભાગ દ્વારા પૂરી પાડવામાં આવતી સત્તાવાર માહિતી પર આધાર રાખવા વિનંતી કરવામાં આવી છે. ખાનગી હોસ્પિટલોને પણ સૂચના આપવામાં આવી છે કે જો કોઈ શંકાસ્પદ કેસ મળી આવે તો તાત્કાલિક સરકાર સાથે સંકલન કરે. પરિસ્થિતિને નિયંત્રણમાં લાવવા માટે સરકારી ટીમો કામ કરી રહી છે.
સેન્ડ ફ્લાય ઘરની અંદરની બાજુ કાચી કે પાકી દિવાલ હોય અને જ્યાં ભેજવાળુ વાતાવરણ હોય ત્યાં જોવા મળે છે. કાચી-પાકી દિવાલમાં તિરાડ કે છિદ્ર હોય ત્યાં સેન્ડ ફ્લાય રહે છે. નરી આંખે આપણને જે માખી દેખાય છે તેના કરતા સેન્ડ ફ્લાય ચાર ગણી નાની હોય છે.