દિલ્હીમાં કારમાં આવેલા 5 શખ્સોએ સ્કૂટી પર સવાર યુવતીને ટક્કર મારીને 10 કિ.મી ઢસડી, પોલીસને નગ્ન હાલતમાં મળી આવી લાશ

Published By
gujaratpost.in
2023-01-02 10:03:07

નવી દિલ્હીઃ રાજધાનીમાં એક ચોંકાવનારી ઘટના સામે આવી છે. દારૂના નશામાં પાંચ યુવકોએ સ્કૂટી પર સવાર યુવતીને બલેનો કારથી ટક્કર મારી હતી, ત્યારબાદ યુવતીને લગભગ 10 કિલોમીટર સુધી ઢસડી હતી. જેમાં યુવતીના શરીરના હાડકાં ભાંગી ગયા હતા અને તેના શરીર પર એક પણ કપડું બચ્યું ન હતું. યુવતીના બંને પગ, માથું અને શરીરના અન્ય ભાગો ખરાબ રીતે કચડાઈ ગયા હતા.સુલતાનપુરી પોલીસે ગુનો નોંધીને આરોપીઓની ધરપકડ કરી લીધી છે. પોસ્ટમોર્ટમ કર્યા બાદ યુવતીની લાશ પરિવારજનોને સોંપી દેવાઇ છે.

પોલીસ અધિકારીનાં જણાવ્યાં અનુસાર આરોપીઓએ જણાવ્યું કે તેઓ દારૂના નશામાં હતા અને કારમાં મોટેથી ગીતો વગાડી રહ્યાં હતા. આ કારણે તેમને ખબર જ ન પડી કે કારમાં યુવતી ફસાઇ ગઇ છે. યુવતી મોડી રાત્રે એક ફંક્શનમાં કામ કરીને સ્કૂટી પર અમન વિહારમાં ઘરે પરત ફરી રહી હતી. પોલીસ અધિકારીઓ તેને માત્ર માર્ગ અકસ્માત ગણાવી રહ્યાં છે. જો કે પોલીસની આ થિયરી પર અનેક સવાલો ઉઠી રહ્યાં છે. યુવતી સાથે કંઈક ગરબડ થવાની પણ શક્યતા છે.

પોલીસના જણાવ્યાં અનુસાર શનિવારે સવારે લગભગ 3.24 વાગ્યે રાહદારીએ રોહિણી જિલ્લાના કાંઝાવાલા પોલીસ સ્ટેશનને જાણ કરી હતી કે ગ્રે રંગની બલેનો કાર કુતુબગઢ તરફ જઇ રહી છે. તેમાં એક લાશ લટકી રહી છે. તરત જ ચોકી પર તૈનાત સ્ટાફને એલર્ટ કરી દેવામાં આવ્યો હતો.કારને શોધવાના પ્રયાસો તેજ કરી દેવામાં આવ્યાં હતા. કણઝાવાલામાં એક યુવતીની નગ્ન હાલતમાં રોડ પર લાશ મળી હતી. માહિતી મળતા જ રોહિણી જિલ્લા ક્રાઇમની ટીમ ઘટના સ્થળે પહોંચી ગઇ હતી અને તપાસ શરૂ કરી હતી.ગુનાના સ્થળેથી પુરાવા લઇને પોલીસે મૃતદેહને સંજય ગાંધી હોસ્પિટલના પોસ્ટ મોર્ટમમાં મોકલી આપ્યો હતો.