ગુજરાતમાં આ સપ્તાહ રહેશે ભારે, મુશળધાર વરસાદને લઇને જળાશયો છલકાયા, પૂર જેવી સ્થિતિ માટે NDRF એલર્ટ

Published By
gujaratpost.in
2023-07-19 09:17:24

અમદાવાદઃ ગુજરાતના મોટાભાગના જિલ્લાઓમાં આ દિવસોમાં મુશળધાર વરસાદને કારણે જનજીવન અસ્તવ્યસ્ત છે. રાજ્યના ઘણા મોટા શહેરોમાં લોકો પાણી ભરાવા અને ટ્રાફિક જામની સમસ્યાનો સામનો કરી રહ્યાં છે. હવામાન વિભાગની આગાહી અનુસાર આ સપ્તાહ દરમિયાન રાજ્યના વિવિધ ભાગોમાં ભારેથી અતિ ભારે વરસાદની સંભાવના છે. ખાસ કરીને અમરેલી, ભાવનગર, વલસાડ, દમણ અને દાદરા નગર હવેલી જેવા સ્થળોએ આજે એટલે કે 19મી જુલાઈના રોજ ભારેથી અતિભારે વરસાદ પડવાની સંભાવના છે. ઉપરાંત સપ્તાહ દરમિયાન સમગ્ર રાજ્યમાં હળવાથી મધ્યમ વરસાદ અને ગાજવીજ સાથે વરસાદની શક્યતા છે.

મંગળવારે રાજકોટ, સુરત અને ગીર સોમનાથ જિલ્લા સહિત ગુજરાતના ઘણા ભાગોમાં ભારેથી અતિભારે વરસાદ પડ્યો હતો. કેટલીક જગ્યાએ પૂર જેવી સ્થિતિ સર્જાઈ હતી અને સામાન્ય જનજીવન અસ્તવ્યસ્ત થઈ ગયું હતું. રાજ્યના ગીર સોમનાથ જિલ્લાના સુત્રાપાડા તાલુકામાં મંગળવારે સવારે 6 વાગ્યા સુધી છેલ્લા 14 કલાકમાં સૌથી વધુ 345 મીમી વરસાદ નોંધાયો છે. IMD એ આગામી થોડા દિવસો દરમિયાન રાજ્યના અલગ-અલગ વિસ્તારોમાં, ખાસ કરીને સૌરાષ્ટ્ર અને દક્ષિણ ગુજરાત પ્રદેશોના કેટલાક જિલ્લાઓમાં ભારેથી અતિ ભારે વરસાદની આગાહી કરી છે.

રાજ્યના વહીવટીતંત્રે ભારે વરસાદ કારણે ઊભી થયેલી સ્થિતિનો સામનો કરવા માટેની તૈયારીઓની સમીક્ષા કરી હતી. રાજકોટ જિલ્લાના ધોરાજી તાલુકામાં સવારે 6 વાગ્યાથી 14 કલાકના સમયગાળા દરમિયાન લગભગ 250 મીમી વરસાદ નોંધાયો હતો, માત્ર બે કલાકમાં 145 મીમી વરસાદ નોંધાયો હતો. સુરતમાં પણ ભારે વરસાદ પડ્યો હતો, દિવસ દરમિયાન આશરે 104 મીમી વરસાદ નોંધાયો હતો, જેને કારણે દક્ષિણ ગુજરાત શહેરમાં સામાન્ય જનજીવન ખોરવાઈ ગયું હતું. જૂનાગઢ જિલ્લાના કેટલાક વિસ્તારોમાં પણ મુશળધાર વરસાદ પડ્યો હતો. સૌરાષ્ટ્ર વિસ્તારના અમરેલી અને ભાવનગર જિલ્લાઓ અને દક્ષિણ વલસાડ જિલ્લામાં 19-21 જુલાઈ વચ્ચે ભારે વરસાદ થવાની સંભાવના છે અને સ્થિતિને પહોંચી વળવા સ્થાનિક વહીવટીતંત્રને જરૂરી સૂચનાઓ આપવામાં આવી છે.