Exclusive-રાષ્ટ્રપતિ એવોર્ડ મેળવનાર મહેશ ચૌધરી નીકળ્યાં ભ્રષ્ટ, ED-DGGI માં રહીને આરોપીઓને પકડનારો બની ગયો ખુદ આરોપી !!

Published By
gujaratpost.in
2023-02-10 00:00:02

2016 નો એવોર્ડ વખતનો ફાઇલ ફોટો

સ્ટોરી- મહેશ આર પટેલ, એડિટર

અમદાવાદમાં અંદાજે 6 કરોડ રૂપિયાનો ફ્લેટ વસાવ્યો

ગાંધીધામ, અમદાવાદઃ કરોડો રૂપિયાની બેનામી સંપત્તિ ભેગી કરનારા ગાંધીધામના સેન્ટ્રલ જીએસટીના આસિસ્ટન્ટ કમિશનર મહેશ ચૌધરીને 2016 માં સારી કામગીરી કરવા બદલ રાષ્ટ્રપતિ એવોર્ડ મળ્યો હતો, આ સમયે આ અધિકારી DGGI માં ફરજ પર હતા, તે વખતે નાણાંમત્રી અરુણ જેટલીના હસ્તે તેમને એવોર્ડ એનાયત કરાયો હતો, ત્યાર બાદ મહેશ ચૌધરીએ ED માં રહીને મની લોન્ડરિંગમાં અનેક આરોપીઓને પકડ્યાં અને હવે તેઓ જાતે જ એક આરોપી બની ગયા.

વર્ષો સુધી અમદાવાદમાં ઉદ્યોગપતિઓને ખંખેર્યાં !

અનેક વર્ષો સુધી અમદાવાદમાં જુદી જુદી સેન્ટ્રલ એજન્સીઓમાં કામ કરનારા ચૌધરીની પોણા ચાર કરોડ રૂપિયાની સંપત્તિ સીબીઆઇને મળી છે, પરંતુ એક અંદાજ પ્રમાણે તેમની પાસે 50 કરોડ રૂપિયાથી વધુ સંપત્તિ હોય શકે છે.અગાઉ અમદાવાદમાં તેમને અનેક ઉદ્યોગપતિઓના ખેલ પાડી દીધા હોવાનું ચર્ચાઇ રહ્યું છે.ચૌધરીના નાણાં વિદેશી બેંકોમાં હોવાની ચર્ચાઓએ પહેલા પણ જોર પકડ્યું હતુ. હવે તેની તપાસ જરૂરી બની છે.

રાજસ્થાનના બાડમેર આસપાસ કરોડોની સંપત્તિનો ઘટસ્ફોટ

રૂપિયા પડાવવામાં માહિર છે આ અધિકારી

મહેશ ચૌધરી ED-DGGI જેવી એજન્સીઓમાં કામ કરી ચુક્યાં છે, હાલમાં તેઓ સીજીએસટી, ગાંધીધામમાં ફરજ પર છે અને અહીં તેમને કરોડો રૂપિયાની લાંચ લઇને વેપારીઓને લૂંટ્યાં છે. કેટલાક ઉચ્ચ અધિકારીઓને પણ લાંચની રકમ આપીને તેઓ સાચવી લેતા હોવાનું ચર્ચાઇ રહ્યું છે. અમદાવાદમાં એક મહિલા ઉચ્ચ અધિકારીનો વહીવટ કરીને કરોડો રૂપિયા આ બંનેએ બનાવ્યાં હતા. બાદમાં આ મહિલા અધિકારીની બદલી થતા ચૌધરીને પણ અમદાવાદ ઓફિસથી રવાના કરી દેવામાં આવ્યાં હતા, તેમ છંતા રૂપિયાની લાલચ તેમનાથી છૂટી ન હતી.

શું છે આખો મામલો ???

2016 માં રાષ્ટ્રપતિ એવોર્ડ મેળવનાર ભ્રષ્ટ અધિકારી મહેશ ચૌધરી ખુદ આરોપી બની ગયા છે, સીબીઆઇએ ચૌધરી અને તેમની પત્ની સામે બેનામી સંપત્તિને લઇને ગુનો દાખલ કર્યો છે. ગાંધીધામના સેન્ટ્રલ જીએસટીના આસિસ્ટન્ટ કમિશનર મહેશ ચૌધરી અને તેમના પત્ની વિરુદ્ધ કરોડો રૂપિયાની અપ્રમાણસર મિલકતને લઇને આ ગુનો દાખલ કરાયો છે. વર્ષ 2017 થી 2021 દરમિયાન તેમને અંદાજે 3 કરોડ 72 લાખ રૂપિયાની બેનામી સંપત્તિ વસાવી હોવાનું સીબીઆઇને જાણવા મળ્યું છે.

મોંઘીદાટ ઘડિયાળો અને ડોલર જપ્ત કરાયા

સગા-સંબંધીઓના નામે પણ વસાવી પ્રોપર્ટી

આ કેસમાં ગુજરાત અને રાજસ્થાનમાં તેમના વતન બિકાનેરમાં મહેશ ચૌધરી સાથે જોડાયેલા ઠેકાણાંઓ પર દરોડાની કાર્યવાહી કરવામાં આવી છે. જેમાં 42 લાખ રૂપિયાની રોકડ મળી હોવાનું સામે આવ્યું છે, સીબીઆઇની જુદી જુદી ટીમો હજુ પણ તપાસ કરી રહી છે.

સોના-ચાંદીના દાગીના અને ડોલર મળ્યાં

ચૌધરીના અમદાવાદના બોડકદેવમાં આવેલા લક્ઝુરિયર્સ ફ્લેટ પર દરોડાની કાર્યવાહી હાથ ધરાઇ છે, જ્યાંથી સોના-ચાંદીના દાગીના મળી આવ્યાં છે, સાથે જ લાખો રૂપિયાની રોકડ જપ્ત થયાનું જાણવા મળ્યું છે. સીબીઆઇના અધિકારીઓ દ્વારા જુદી જુદી જગ્યાઓએ દરોડાની કાર્યવાહી હાથ ધરવામાં આવી છે, ચૌધરી સાથે જોડાયેલા વહીવટદારોની ધરપકડના ભણકાર વાગી રહ્યાં છે.આ અધિકારીએ અગાઉ અમદાવાદમાં નોકરી કરીને કરોડો રૂપિયાના તોડ કર્યાં હોવાનું ચર્ચાંઇ રહ્યું છે.