- રૂ. 307 કરોડના ખર્ચે અત્યાધુનિક મેન્ટેનન્સ હબ આકાર લઈ રહ્યું છે
- બે મેન્ટેનન્સ લાઇન હશે
અમદાવાદ: શહેરમાં ટૂંક સમયમાં જ વંદે ભારત ટ્રેનોનું મોટું સમારકામ શક્ય બનશે, જેથી નિર્ધારિત ઓવરહોલિંગ માટે ટ્રેનસેટ્સને અન્ય સ્થળોએ મોકલવાની જરૂરિયાત ઘટશે. સાબરમતી ખાતે રૂ. 307 કરોડના ખર્ચે એક અત્યાધુનિક મેન્ટેનન્સ હબ આકાર લઈ રહ્યું છે, જ્યાં કોચ, વ્હીલ્સ તેમજ મહત્ત્વપૂર્ણ મિકેનિકલ અને ઇલેક્ટ્રિકલ સિસ્ટમ્સની સર્વિસિંગ એક જ છત નીચે ઉપલબ્ધ બનશે.
પશ્ચિમ રેલવેના અમદાવાદ ડિવિઝન દ્વારા સાબરમતી ઇન્ટિગ્રેટેડ કોચિંગ ડેપોના ફેઝ-II ના ભાગરૂપે આ સુવિધા વિકસાવવામાં આવી રહી છે, જેને 24-કોચ ધરાવતા વંદે ભારત ટ્રેનસેટ્સના નિર્ધારિત મેન્ટેનન્સ માટે ડિઝાઇન કરવામાં આવી છે. જેમ જેમ આ પ્રીમિયમ ટ્રેનોનું સંચાલન વિસ્તરી રહ્યું છે, તેમ તેમ આ ડેપોથી આ ટ્રેનોની જાળવણી કરવાની શહેરની ક્ષમતા વધુ મજબૂત બનવાની અપેક્ષા છે.
આ પ્રોજેક્ટમાં હેવી રિપેરિંગ, વ્હીલ મેન્ટેનન્સ અને મહત્ત્વપૂર્ણ ઉપકરણોના ઓવરહોલિંગ માટે સમર્પિત શેડ્સનો સમાવેશ થાય છે. હેવી રિપેર શેડનું કામ પૂર્ણતાના આરે છે અને તેમાં બે મેન્ટેનન્સ લાઇન હશે. જેમાં એક કોચને ઊંચકીને બોગીઓને અલગ કરશે અને બીજી ઇન્ટિરિયર, પેસેન્જર સુવિધાઓ, બ્રેકિંગ સિસ્ટમ તેમજ ઇલેક્ટ્રિકલ સાધનોના સમારકામ માટે ઉપયોગમાં લેવાશે.















