રાજકોટમાં મિલકતના વિવાદમાં સગા બે ભાઈઓની હત્યા: ભત્રીજાએ બે કાકાઓને છરીના ઘા ઝીંક્યા

19 જુલાઈની રાત્રે આશરે 1 વાગ્યાની આસપાસ આ લોહિયાળ ખેલ ખેલાયો હતો. પ્રથમ ફરિયાદ મૃતકના પુત્ર લાખાભાઈ સુરેશભાઈ ધોળકીયાએ નોંધાવી હતી. ફરિયાદ મુજબ, મોડી રાત્રે તેમના કાકા રાજેશભાઈનો ફોન આવ્યો હતો કે કૌટુંબિક ભત્રીજો હાર્દિક ધોળકિયા તેમના ઘર પાસે આવીને ગાળાગાળી કરી રહ્યો છે.

જેથી લાખાભાઈ અને તેમના પિતા સુરેશભાઈ તાત્કાલિક ત્યાં પહોંચ્યા હતા. તે સમયે હાર્દિક ઉગ્ર થઈને ગાળો બોલી રહ્યો હતો. પરિવારના સભ્યો તેને શાંત પાડવા અને ગાળો ન બોલવા સમજાવવા નજીક ગયા, ત્યારે જ હાર્દિકે ઉશ્કેરાઈને કહ્યું, અમારો ભાગ કેમ આપતા નથી ? તેમ કહી પોતાની પાસે રહેલી છરી કાઢી સુરેશભાઈના છાતીના ભાગે ઝીંકી દીધી હતી, જેથી તેઓ ત્યાં જ ઢળી પડ્યા હતા.

પિતાને બચાવવા વચ્ચે પડેલા કાકા રાજેશભાઈ પર પણ હાર્દિકે છરીના ઉપરાછાપરી ઘા ઝીંકી દીધા હતા. ઉપરાંત, પિતા અને કાકાને છોડાવવા વચ્ચે પડેલા લાખાભાઈ પર પણ હાર્દિકે છરીથી હુમલો કરતા તેમને વાસામાં અને હાથના ભાગે ઈજાઓ થઈ હતી. ગંભીર રીતે ઘાયલ સુરેશભાઈ અને રાજેશભાઈને હોસ્પિટલ ખસેડવામાં આવ્યા હતા, જ્યાં બંને સગા ભાઈઓનું મોત નીપજ્યું હતું. બંને ભાઈઓના મોતથી ધોળકિયા પરિવારમાં ભારે કલ્પાંત છવાઈ ગયો છે. મૃતક સુરેશભાઈ મૂળ અમરેલી જિલ્લાના દુધાળા ગામના વતની હતા અને ખેતી તથા પશુપાલન સાથે સંકળાયેલા હતા.

બીજી તરફ, આ મારામારીની ઘટનામાં આરોપી હાર્દિક ધુળાભાઈ ધોળકિયા (ઉં.વ. 27) પણ ગંભીર રીતે ઈજાગ્રસ્ત થયો હતો, જેને સારવાર અર્થે ખાનગી હોસ્પિટલમાં ખસેડવામાં આવ્યો હતો. હાર્દિક ધોળકિયા તરફથી સામા પક્ષે વળતી ફરિયાદ નોંધાવવામાં આવી હતી. જેમાં તેને મૃતક સુરેશભાઈ ઉર્ફે સુરાભાઈ ધોળકીયા, લાખા સુરેશભાઈ ધોળકીયા, રાજેશભાઈ ધોળકીયા અને શિવા નથુભાઈ ડોંડા સામે લોખંડના પાઇપ અને છરી વડે માથા તથા શરીરના અન્ય ભાગે જીવલેણ હુમલો કર્યો હોવાનો આક્ષેપ કર્યો છે.