Rajkot Crime News: રાજકોટમાં સ્પામાં છરી સાથે બે શખ્સોએ મચાવ્યો આતંક, તોડફોડ કરીને મહિલા કર્મીને જાનથી મારી નાખવાની ધમકી આપી

ઘટનાની વિગતો મુજબ, 27 ઓક્ટોબરના રોજ રાત્રે 10.15 વાગ્યે સ્પાના કર્મચારી આફતાબ અસલમભાઈ સોલંકી રિસેપ્શન કાઉન્ટર પર હાજર હતા. તે દરમિયાન અચાનક બે શખ્સો સ્પામાં ધસી આવ્યાં હતા, એક શખ્સના હાથમાં છરી હતી. તેણે કાઉન્ટર પર આવી કર્મચારીને છરી બતાવી અગાઉ થયેલી બોલાચાલીની દાઝ રાખી ગાળાગાળી શરૂ કરી દીધી હતી અને ધમકીઓ આપવા લાગ્યો હતો.

છરી બતાવી આતંક મચાવતાં ભયના માર્યા સ્પા સંચાલક અને કર્મચારીઓ નીચે ઉતરી ગયા હતા. ત્યાર બાદ હુમલાખોરોએ ઉપર જઈ આફતાબ સોલંકીનો આશરે રૂ. 15,000ની કિંમતનો વીવો કંપનીનો મોબાઈલ ફોન તોડી નાખ્યો હતો અને સ્પામાં નાની-મોટી તોડફોડ કરી નુકસાન પહોંચાડ્યું હતું.

બનાવ બાદ સ્પા સંચાલક જયેશ વાઘેલાએ સીસીટીવી ફૂટેજ ચકાસતા હુમલાખોરોની ઓળખ થઈ હતી. સંચાલકના મોટાભાઈ સાથે  એક મહિના પહેલાં સ્પામાં આવેલા કેતન પરમાર નામના શખ્સ સાથે બોલાચાલી થઈ હતી. એ જ જૂની અદાવતનો ખાર રાખીને કેતન પરમાર તથા કાળા રંગનું ટી-શર્ટ પહેરી હાથમાં છરી સાથે આવેલા તેના સાગરિતે સ્પામાં પ્રવેશ કરી મહિલા કર્મચારી સહિતના સ્ટાફને જાનથી મારી નાખવાની ધમકી આપી હતી.