ગોંડલમા પરિણીતાને ટ્રેન નીચે ધકેલીને પ્રેમીએ કરી હત્યા, પોલીસે કરાવ્યું રી-કન્સ્ટ્રક્શન

પરિણીત મહિલા છેલ્લા અઢી વર્ષથી પતિથી અલગ રહીને ગોંડલમાં હોટેલ અને કેટરિંગનું કામ કરતી હતી. તેને સંતાનમાં બે પુત્રો અને બે પુત્રીઓ છે. આ દરમિયાન 25 વર્ષીય પ્રકાશ સોલંકી સાથે પરિચય થતાં તેમની વચ્ચે પ્રેમસંબંધ બંધાયો હતો. મહિલા પ્રકાશ સાથે લગ્ન કરવા માંગતી હતી, પરંતુ પરિણીતા હોવાથી પ્રકાશનો પરિવાર તૈયાર ન હતો. મહિલાની સતત જીદથી કંટાળીને પ્રકાશે તેની હત્યાનો પ્લાન ઘડ્યો હતો.

આ બંને 3 ઓગસ્ટની રાત્રે 11:30 વાગ્યે બંને ગોંડલ રેલવે સ્ટેશન પહોંચ્યાં હતા, જેના સીસીટીવી ફૂટેજ પણ મળ્યાં છે. ત્યાંથી ચાલીને ગુંદાળા ફાટક નજીક ટ્રેક પર બેઠા હતા. 4 ઓગસ્ટે રાત્રે 1:30 વાગ્યે ટ્રેન નજીક આવતા જ પ્રકાશે ટ્રેક પરથી દૂર ખસી જવાનું બહાનું કાઢી ઉભા થઈ મહિલાને ટ્રેન સામે ધક્કો મારી દીધો હતો, જેથી તેનું સ્થળ પર જ મોત નિપજ્યું હતું.

શરૂઆતમાં અકસ્માતમાં મોત થયું હોવાનું જણાતું હતું. પરંતુ મૃતકના પર્સમાંથી મળેલી વિગતો પરથી પરિજનોનો સંપર્ક કરી ઓળખ મેળવાઈ હતી. શરીર પર ઈજાના નિશાન હોવાથી રાજકોટ સિવિલ હોસ્પિટલમાં ફોરેન્સિક પોસ્ટમોર્ટમ કરાવતા હત્યા થઈ હોવાનો ખુલાસો થયો હતો.

પોલીસે શંકાને આધારે પ્રકાશ સોલંકીની પૂછપરછ કરતા તેણે લગ્નની જીદથી કંટાળીને પ્રેમિકાની હત્યા કરી હોવાની કબૂલાત કરી હતી.