રાજકોટ: FB પર મિત્રતા કરીને ખેડૂત સાથે રૂ. 6.30 લાખનું સાયબર ફ્રોડ, એક મહિલા સહિત 3 વિદેશી ઝડપાયા

જસદણના ખેડૂતે 'Mary M Samuelf' નામના ફેસબુક એકાઉન્ટ પરથી આવેલી ફ્રેન્ડ રિક્વેસ્ટ સ્વીકારી હતી. બીજા જ દિવસે ખેડૂત પર યુવતીનો ફોન આવ્યો હતો, જેમાં તેણે પોતે વિધવા અને એક દીકરાની માતા હોવાનું જણાવી ખેડૂતનો વિશ્વાસ જીત્યો હતો. બાદમાં યુવતીએ સામેથી જ ખેડૂત અને તેના પરિવાર માટે જર્મનીથી કિંમતી ગિફ્ટ પાર્સલ મોકલવાની ઈચ્છા વ્યક્ત કરી હતી.

જોસેફાઈન ઉર્ફે એન્જલ નામની આ યુવતીએ વોટ્સએપ ચેટિંગ દ્વારા પાર્સલ મોકલી દીધાની જાણ કરી હતી. ત્યાર બાદ આ ગેંગના અન્ય સભ્યોએ દિલ્હી એરપોર્ટના કર્મચારી બનીને અજાણ્યા નંબર પરથી ખેડૂતનો સંપર્ક કર્યો હતો. તેમણે ગિફ્ટ ખૂબ જ મોંઘી હોવાનું કહી તેને છોડાવવા માટે વિવિધ ટેક્સ અને ફીના નામે ટુકડે-ટુકડે રૂ. 6.31 લાખ ભરાવી લીધા હતા. બાદમાં ગિફ્ટ ન મળતા અને વધુ પૈસાની માંગણી થતા ખેડૂતને પોતાની સાથે છેતરપિંડી થઈ હોવાનો અહેસાસ થયો હતો અને તેમણે પોલીસ ફરીયાદ નોંધાવી હતી.

ફરિયાદને આધારે રાજકોટ સાયબર ક્રાઈમે સોશિયલ મીડિયા એકાઉન્ટ, મોબાઈલ નંબર, વોટ્સએપ ચેટ, આઈપી લોગ્સ અને બેંક ટ્રાન્ઝેક્શનનું ઊંડાણપૂર્વક ટેકનિકલ એનાલિસિસ કર્યું હતું. તપાસ દરમિયાન આ ગેંગ ઉત્તર પ્રદેશના ગ્રેટર નોઈડા ખાતે રહીને ફ્રોડ કરતી હોવાનો ખુલાસો થતાં પોલીસે દરોડો પાડી યુવતી સહિત ત્રણેય આરોપીઓની અટકાયત કરી હતી.

તપાસમાં સામે આવ્યું છે કે આ સાયબર ફ્રોડ માટે આરોપીઓએ અલગ-અલગ 15 બેંક ખાતાઓનો ઉપયોગ કર્યો હતો. પોલીસે આ તમામ બેંક ખાતાઓને ફ્રિઝ કરવાની કાર્યવાહી હાથ ધરી છે.