રાજકોટમાં મુસ્લિમ યુવકે હિન્દુ નામ ધારણ કરીને સગીરાને પ્રેમજાળમાં ફસાવી, અનેક વખતે બાંધ્યાં શરીરસંબંધો

હાલ 20 વર્ષની થઈ ચૂકેલી યુવતીએ ગાંધીગ્રામ પોલીસ સ્ટેશનમાં આરોપી શાહરૂખ બશીરભાઈ જામ વિરૂદ્ધ ફરિયાદ નોંધાવી છે. પીડિતાએ જણાવ્યું હતું કે, આશરે 3 વર્ષ પહેલાં જ્યારે તે 17 વર્ષની સગીરા હતી, ત્યારે 31 જુલાઈ 2023ના રોજ એક બહેનપણીની બર્થડે પાર્ટીમાં તેની મુલાકાત શાહરૂખ સાથે થઈ હતી. મુલાકાતના ત્રણેક દિવસ બાદ આરોપીએ મેસેજ કરીને પોતાની ઓળખ વૃષભ દવે તરીકે આપી વાતચીત શરૂ કરી હતી અને લગ્નની લાલચ આપી સગીરાને પ્રેમજાળમાં ફસાવી દીધી હતી.

પ્રેમજાળમાં ફસાવ્યાં બાદ એક દિવસ સગીરાના નાની કામ અર્થે બહારગામ ગયા હતા અને સગીરા ઘરમાં એકલી હતી, ત્યારે આરોપી ઘરમાં ઘૂસી આવ્યો હતો અને છેડતી કરી હતી. ત્યાર બાદ તે સગીરાને બસ સ્ટેન્ડ પાછળ આવેલી વાત્સલ્ય હોટેલ ખાતે લઈ ગયો હતો અને ત્યાં તેની પર દુષ્કર્મ આચર્યું હતું. આ પછી પણ અલગ-અલગ જગ્યાએ અવારનવાર સગીરા સાથે સંબંધ બાંધ્યો હતો.

આ દરમિયાન સગીરાના હાથમાં આરોપીનું અસલી ઓળખકાર્ડ આવી ગયું હતું, જેમાં તેનું સાચું નામ શાહરૂખ બશીરભાઈ જામ હોવાનો ખુલાસો થતાં સગીરાના પગ નીચેથી જમીન સરકી ગઈ હતી. વારંવારના દુષ્કર્મને કારણે સગીરા ગર્ભવતી બની ગઈ હતી. સગીરાએ જ્યારે લગ્ન માટે દબાણ કર્યું ત્યારે આરોપીએ પોતે પરિણીત હોવાનું જણાવ્યું હતું અને છૂટાછેડા લીધા બાદ લગ્ન કરવાનું કહી મેડિકલમાંથી દવા લાવી સગીરાનો ગર્ભપાત કરાવી નાખ્યો હતો. ગર્ભપાત બાદ આરોપી લગ્ન અંગે ગોળ- ગોળ જવાબો આપતો હોવાથી સગીરાએ તેની સાથે સંબંધો તોડી નાખ્યા હતા.

પિતાની ગેરહાજરીમાં નાની સાથે રહેતી પીડિતાએ આ સમગ્ર આપવીતી પોતાની નાનીને જણાવી હતી. નાનીએ દોહિત્રીને પૂરેપૂરી હિંમત આપતા તેઓ ગાંધીગ્રામ પોલીસ સ્ટેશન પહોંચ્યા હતા. પોલીસે પીડિતાની ફરિયાદના આધારે વિધર્મી શખ્સ શાહરૂખ બશીરભાઈ જામ વિરૂદ્ધ દુષ્કર્મ અને પોક્સો એક્ટની કલમો હેઠળ ગુનો નોંધી તેને સકંજામાં લઈ કાયદેસરની કાર્યવાહી હાથ ધરી હતી.