રાજકોટમાં પત્ની સાથેના અણબનાવમાં જમાઈએ નાનાની હત્યા કરી, નાની ગંભીર

મળતી માહિતી મુજબ, મૂળ વેરાવળના વિવેક ગોસ્વામી નામના શખ્સના લગ્ન થયા બાદ છેલ્લા ઘણા સમયથી તેની પત્ની સાથે અણબનાવ ચાલી રહ્યો હતો. પત્નીએ પતિ વિવેક સાથે રહેવા જવાની સ્પષ્ટ ના પાડી દીધી હતી. આ બાબતની અદાવત રાખીને આરોપી વિવેક અવારનવાર પત્ની અને તેના પરિવારને ધાક-ધમકીઓ આપતો હતો.

પત્નીના પરિવારે આ ભયના કારણે અગાઉ સુરક્ષાની માંગ સાથે રાજકોટના યુનિવર્સિટી પોલીસ મથકમાં લેખિત અરજી પણ આપી હતી. જો કે, ગઈકાલે મોડી રાત્રે આ વિવાદે લોહિયાળ વળાંક લીધો હતો.

આરોપી વિવેક ગોસ્વામી ગત મોડી રાત્રે વિમલનગર વિસ્તારમાં આવેલી તેની પત્નીના મોસાળના ઘરે પહોંચ્યો હતો. ત્યાં પત્ની સાથેના અણબનાવની અદાવતમાં તેણે ઉશ્કેરાઈને પત્નીના નાના પ્રવિણભાઇ શાહ પર છરી વડે તીક્ષ્ણ હુમલો કરી દીધો હતો. આ હુમલો એટલો ગંભીર હતો કે પ્રવિણભાઇનું ઘટના સ્થળે જ કમકમાટીભર્યું મોત નીપજ્યું હતું.

આટલેથી ન અટકતા, નરાધમ આરોપીએ પત્નીના નાનીને પણ નિશાન બનાવ્યાં હતા અને તેમના ગળાના ભાગે છરીના ઘા મારી દીધા હતા. હાલમાં નાનીની સ્થિતિ ગંભીર હોવાનું જાણવા મળ્યું છે અને તેઓ હોસ્પિટલમાં સારવાર હેઠળ છે. ઘટનાની જાણ થતાં જ રાજકોટ ક્રાઇમ બ્રાન્ચ અને સ્થાનિક પોલીસની ટીમો તાત્કાલિક ઘટનાસ્થળે દોડી ગઈ હતી. પોલીસે મૃતદેહને પોસ્ટમોર્ટમ અર્થે ખસેડી આગળની કાર્યવાહી હાથ ધરી હતી.