સુરતઃ રેસ્ટોરન્ટમાંથી ખાવાનું મંગાવ્યું અને ખાધા બાદ 5 વર્ષની બાળકીનું મોત, 4 સભ્યો હોસ્પિટલમાં

વરાછાની રણુજાધામ સોસાયટીમાં રહેતા અશોકભાઈ કળસરિયાના પરિવારે 15 ઓગસ્ટની રાત્રે સ્થાનિક શીતલ રેસ્ટોરન્ટમાંથી કાજુ અને પનીરનું પંજાબી શાક પાર્સલ મંગાવ્યું હતું. આ ભોજન લીધા બાદ પરિવારના તમામ સભ્યોની તબિય લથડી હતી. તબિયત વધુ બગડતાં તમામને તાત્કાલિક પુણાગામ સ્થિત સદવિચાર હોસ્પિટલમાં દાખલ કરવામાં આવ્યા હતા.

હોસ્પિટલ પહોંચ્યાના માત્ર 20 મિનિટમાં જ 5 વર્ષની બાળકીનું મોત નીપજ્યું હતું. અશોકભાઈ, તેમનાં પત્ની અને અન્ય બે દીકરીઓ હાલ ગંભીર હાલતમાં સારવાર હેઠળ છે. તેમના પ્રાથમિક મેડિકલ રિપોર્ટમાં ફૂડ પોઈઝનિંગની પુષ્ટિ થઈ છે. પીડિતના મોટાભાઈએ  જણાવ્યું કે, અમારી પાસે ગૂગલ પે દ્વારા પેમેન્ટ અને ખરીદીના તમામ પુરાવા છે. સમગ્ર સત્ય બહાર લાવવા માટે દુકાનના સીસીટીવી  ફૂટેજ અને ફૂડ સેમ્પલની કડક તપાસ થવી જોઈએ.

ઘટનાની ગંભીરતાને ધ્યાને લઈને રાજ્યના આરોગ્ય મંત્રી પ્રફુલ પાનશેરીયાએ તાત્કાલિક હસ્તક્ષેપ કર્યો હતો. જિલ્લા આરોગ્ય અધિકારી અને સુરત મહાનગરપાલિકાનાઆરોગ્ય અધિકારીઓ સાથે વીડિયો કોન્ફરન્સ યોજી વિસ્તૃત તપાસના આદેશ આપ્યા હતોય હોસ્પિટલના તબીબો સાથે સંપર્ક સાધી પરિવારને શ્રેષ્ઠ સારવાર આપવા તાકીદ કરી હતી. ઉપરાંત રાજ્યભરની રેસ્ટોરન્ટોમાં સ્વચ્છતા અને ફૂડ સેફ્ટીના નિયમોનું કડક પાલન કરાવવા સ્પષ્ટ નિર્દેશ જાહેર કર્યા હતા.