સુરતમાં વાઇબ્રન્ટ ગુજરાત રિજનલ કોન્ફરન્સનું સમાપન, દક્ષિણ ગુજરાતમાં રૂ. 3.53 લાખ કરોડના 2792 MoU થયા

સમાપન સત્રને સંબોધતા કેન્દ્રીય આરોગ્ય મંત્રી જે.પી. નડ્ડાએ જણાવ્યું કે, ગુજરાત દેશની કુલ જીડીપીમાં 8 ટકા, મેન્યુફેક્ચરિંગમાં 17 ટકા અને મર્ચેન્ડાઈઝ એક્સપોર્ટમાં 27 ટકા હિસ્સો ધરાવે છે. તેમણે ઉમેર્યું કે,વડાપ્રધાન નરેન્દ્ર મોદીએ 2003માં શરૂ કરેલી વાઇબ્રન્ટ ગુજરાતની પરંપરા આજે અન્ય રાજ્યો માટે મોડેલ બની છે. સુરતનું ડાયમંડ-ટેક્સટાઈલ અને ભરૂચ-અંકલેશ્વરનું કેમિકલ હબ હવે વૈશ્વિક સ્તરે પ્રસ્થાપિત થયું છે. ટ્રાઈબલ વિસ્તારોને ગાર્મેન્ટિંગ ઉદ્યોગ સાથે જોડી વિકાસના નવા દ્વાર ખોલવામાં આવી રહ્યાં છે.

નાયબ મુખ્યમંત્રી હર્ષ સંઘવીએ મોટી જાહેરાત કરતા જણાવ્યું કે, આ કોન્ફરન્સ દરમિયાન થયેલા MoU આગામી ત્રણ વર્ષમાં કાર્યરત થવાથી દક્ષિણ ગુજરાતના 2.82 લાખથી વધુ યુવાનોને પ્રત્યક્ષ રોજગારી મળશે. ગુજરાતની જીડીપી 2003માં રૂ. 1.29 લાખ કરોડ હતી, જે આજે વધીને રૂ. 27.09 લાખ કરોડ પર પહોંચી છે.

હવેથી રિજનલ કોન્ફરન્સમાં ઉદ્યોગકારોની સમસ્યાઓના ત્વરિત નિરાકરણ માટે ઓપન ડોર મીટિંગ યોજાશે. આદિજાતિ વિસ્તારો (ડાંગ, તાપી, વલસાડ, નવસારી) માં ગાર્મેન્ટ સેક્ટર દ્વારા આગામી બે વર્ષમાં 25 હજારથી વધુ મહિલાઓને રોજગારી અપાશે.

ભાજપ પ્રદેશ પ્રમુખ જગદીશ વિશ્વકર્માએ જણાવ્યું કે, ગુજરાત આજે ટેલેન્ટ અને ટેકનોલોજીનો પર્યાય બન્યું છે. અધિક મુખ્ય સચિવ મમતા વર્માએ આ કોન્ફરન્સને સ્કેલ અને સ્કીલના સમન્વય તરીકે ઓળખાવી હતી. આ પ્રસંગે વિવિધ કેટેગરીમાં શ્રેષ્ઠ MSE અને MSME એવોર્ડ્સ એનાયત કરવામાં આવ્યા હતા.