Real Stories. Real Gujarat.
સુરત: શહેરના વરાછા વિસ્તારમાં ધોરણ-5 માં અભ્યાસ કરતી માસૂમ બાળકીએ ઘરમાં જ ગળેફાંસો ખાઈ આપઘાત કરી લેતા ચકચાર મચી છે, માતા- પિતા રોજિંદા કામકાજ અર્થે બહાર ગયા હતા, દરમિયાન બાળકીએ આ અંતિમ પગલું ભરી લીધું હતુ, આટલી નાની વયે બાળકીએ કેમ આવું પગલું ભર્યું તે અંગેનું ચોક્કસ કારણ હજુ સુધી સામે આવ્યું નથી, પોલીસે ગુનો નોંધીને તપાસ શરૂ કરી છે.
મળતી વિગતો અનુસાર, વરાછા સ્થિત સહજાનંદ સોસાયટીમાં વિજયભાઈ કુશવાહ પરિવાર સાથે રહે છે. તેમને સંતાનોમાં ત્રણ દીકરી અને એક દીકરો છે. રોજિંદી દિનચર્યા મુજબ વિજયભાઈ અને તેમના પત્ની કામ પર ગયા હતા, ત્યારે ચારેય બાળકો ઘરમાં એકલા હતાં. સાંજે બાળકોને ટ્યુશન મૂકવાના સમયે માતા પરત ઘરે પહોંચી ત્યારે ઘરનો મુખ્ય દરવાજો અંદરથી બંધ હતો.
વારંવાર ખખડાવવા છતાં દરવાજો ન ખૂલતાં આસપાસના પાડોશીઓની મદદથી દરવાજો તોડવામાં આવ્યો હતો. અંદર પ્રવેશતાં જ ધોરણ-5 માં ભણતી રોલી કપડાં સૂકવવાની દોરી પર ગળેફાંસો ખાધેલી હાલતમાં મળી આવતાં પરિવારજનોના પગ નીચેથી જમીન સરકી ગઈ હતી. બાળકીને તાત્કાલિક નીચે ઉતારવામાં આવી હતી, પરંતુ સારવાર મળે તે પહેલાં જ તેનો જીવ જતો રહ્યો હતો.
પિતા વિજયભાઈએ હૈયાફાટ રુદન સાથે જણાવ્યું કે, અમે રોજની જેમ મજૂરી-કામ પર ગયા હતા. ચારેય બાળકો ઘરે જ હતાં. અમારી પાછળ દીકરીએ શા માટે આટલું મોટું પગલું ભરી લીધું તે વાત હજુ સમજાતી નથી. હાલમાં પોલીસે આ કેસની વધુ તપાસ શરુ કરી છે.
