સુરતના માથાભારે સતિષ મરાઠાની ધાતકી હત્યાનો લાઈવ વીડિયો આવ્યો સામે

બનાવની ગંભીરતાને ધ્યાનમાં રાખી સુરત ક્રાઈમ બ્રાન્ચ અને તાપી જિલ્લા LCB પોલીસે સંયુક્ત ઓપરેશન હાથ ધર્યું હતું. મહારાષ્ટ્ર સરહદ તરફ ભાગી રહેલા હુમલાખોરોને આંતરીને પોલીસે 4 મુખ્ય આરોપીઓ તથા કાયદાના સંઘર્ષમાં આવેલા 4 કિશોરોને ઝડપી પાડ્યા હતા. આ ઉપરાંત વધુ એક આરોપીની ધરપકડ કરવામાં આવી છે, જેથી આ પ્રકરણમાં અત્યાર સુધીમાં કુલ 9 આરોપીઓની ધરપકડ થઈ ચૂકી છે, જ્યારે અન્ય એક ફરાર આરોપીની શોધખોળ ચાલુ છે.

પોલીસ તપાસમાં બહાર આવેલા તથ્યો મુજબ, આ હત્યાકાંડ પાછળ જૂની વેરઝેર અને વર્ચસ્વની લડાઈ કારણભૂત છે. ગત ફેબ્રુઆરી માસમાં ગોડાદરા ખાતે ગણેશ ખુટીયા પર થયેલા હુમલાના ગુનામાં કેતન ઉર્ફે સન્ની અને રાહુલ દુબે લાજપોર જેલમાં ગયો હતો. ત્યાં ગુજસીટોક હેઠળ જેલમાં બંધ રાહુલ સોમન મંડલ સાથે તેમનો સંપર્ક થયો હતો. સતિષ મરાઠા સાથે આ તમામની જૂની દુશ્મનાવટ હોવાથી રાહુલે સતિષને રસ્તામાંથી હટાવવા માટે તમામ મદદ કરવાની ખાતરી આપીને ષડયંત્ર રચ્યું હતું.

બુધવારે સાંજે સતિષ મરાઠા એક યુવતી સાથે કારમાં પસાર થઈ રહ્યો હતો, ત્યારે અગાઉથી વોચ ગોઠવીને બેઠેલા સગીરોએ બાઈક પર આવીને કારનો કાચ તોડી નાખ્યો હતો. સતિષ ગુસ્સામાં બહાર આવતા જ આસપાસ છુપાયેલા આરોપીઓએ તેને ઘેરી લીધો હતો. ભૂતકાળમાં પણ ગોડાદરા બ્રિજ નીચે મરચાની ભૂકી નાખીને તેમજ અન્ય ઈસમો દ્વારા સતિષ પર હુમલા કરાયા હતા, પરંતુ તે બચી ગયો હતો. આ વખતે સતિષ સામેથી હુમલો કરે તે પહેલા જ આ ગેંગે આયોજનબદ્ધ રીતે ઘાતક હથિયારો અને ફાયરિંગ વડે તેનો ખેલ ખતમ કરી નાખ્યો હતો.