સુરતની હોસ્પિટલમાં પિત્તાશયની પથરીના ઓપરેશન બાદ દર્દીનું શંકાસ્પદ હાલતમાં મોત: પરિવારનો હોબાળો

મૃતકના પરિવારજનોએ  તબીબો પર ગંભીર આક્ષેપો કરતા જણાવ્યું હતું કે,અમે સવારે 11.00 વાગ્યે ધરમવીરસિંહને દાખલ કર્યા હતા. ડૉક્ટરે ઓપરેશન પહેલાં બધા રિપોર્ટ નોર્મલ હોવાનું કહી ચિંતા ન કરવા જણાવ્યું હતું. જો કે, એક રિપોર્ટમાં લોહી ઓછું હોવા છતાં તેમણે સાંજે 5.30 વાગ્યે ઓપરેશન શરૂ કર્યું હતું. રાત્રે 8.30 વાગ્યે ડૉક્ટર ઓપરેશન થિયેટરમાંથી બહાર નીકળીને કોઈ પણ જવાબ આપ્યાં વિના સીધા ઘરે ચાલ્યા ગયા હતા અને ત્યાર બાદ સ્ટાફે દર્દીના મોતની જાણ કરી હતી.

પરિવારજનોએ ચીમકી ઉચ્ચારી હતી કે જ્યાં સુધી ડૉક્ટર પોતાની ભૂલ ન સ્વીકારે અને પોલીસ કડક પગલાં ન ભરે ત્યાં સુધી તેઓ મૃતદેહ સ્વીકારશે નહીં. પરિવારે સિવિલ- સ્મીમેર હોસ્પિટલ ખાતે પેનલ ડૉક્ટરો દ્વારા ફોરેન્સિક પોસ્ટમોર્ટમ કરાવ્યાં બાદ શબને સીધું અનુપમ હોસ્પિટલના ગેટ પર લાવીને અડિંગો જમાવ્યો હતો.

બીજી તરફ, આ ગંભીર આક્ષેપો અંગે અનુપમ સર્જિકલ હોસ્પિટલના જનરલ સર્જન ડૉ. શૈલેષ એન. પટેલે પોતાનો પક્ષ રજૂ કરતા જણાવ્યું હતું કે,દર્દીને પિત્તાશયની થેલીના ગળાના ભાગમાં પથરી ફસાયેલી હોવાથી અંદર સખત સોજો અને ગંદકી ફેલાઈ ગઈ હતી, જેના કારણે તાત્કાલિક સર્જરી જરૂરી હતી. લગભગ અઢીથી ત્રણ કલાકની મહેનત બાદ સફળતાપૂર્વક સર્જરી પૂરી થઈ હતી અને કોઈ કોમ્પ્લિકેશન ન હતું. દર્દીનું મોત સડન કાર્ડિયાક અરેસ્ટના કારણે થયું છે.