સુરત: રેગિંગથી કંટાળીને મેડિકલના વિધાર્થીએ કરી આત્મહત્યા, હોસ્ટેલમાં મૃતદેહ લટકતી હાલતમાં મળી આવ્યો

રવિવારે સવારે હોસ્ટેલમાં રૂમ નંબર 1004 નો દરવાજો અંદરથી બંધ હતો. હર્ષ પંડ્યાનો સંપર્ક થઈ શક્યો ન હતો, જેના કારણે તેમના સાથી ડોક્ટરો રૂમમાં પહોંચ્યાં હતા. લાંબા સમય સુધી કોઈ જવાબ ન મળતાં સુરક્ષા કર્મચારીઓને બોલાવવામાં આવ્યાં હતા. દરવાજો તોડીને અંદર પ્રવેશતા, તેઓ પંખા સાથે લટકતા જોવા મળ્યાં હતા. તેમને તાત્કાલિક હોસ્પિટલમાં લઈ જવામાં આવ્યાં હતા, જ્યાં ડોક્ટરોએ તેમને મૃત જાહેર કર્યા હતા. પોલીસે પોસ્ટમોર્ટમ તપાસ હાથ ધરી છે. 

આ ઘટના બાદ, મેડિકલ કોલેજની એન્ટી-રેગિંગ કમિટી, એન્ટી-રેગિંગ સ્ક્વોડ અને કોલેજ કાઉન્સિલ દ્વારા સંયુક્ત તપાસ હાથ ધરવામાં આવી હતી. મેડિકલ કોલેજ વહીવટીતંત્રના જણાવ્યા અનુસાર, લગભગ આઠ કલાક ચાલેલી બેઠક દરમિયાન માઇક્રોબાયોલોજી વિભાગના રેસિડેન્ટ ડોકટરો, ફેકલ્ટી અને અન્ય સ્ટાફ સભ્યોના નિવેદનો લેવામાં આવ્યા હતા. તપાસમાં બીજા વર્ષના 4 રેસિડેન્ટ ડોકટરો દ્વારા જુનિયર ડોકટરો પર રેગિંગ અને માનસિક ત્રાસ આપવાના આરોપો બહાર આવ્યા હતા.

ન્યૂ સિવિલ હોસ્પિટલના સુપરિન્ટેન્ડેન્ટ ડો. પારુલ વડગામાના જણાવ્યાં અનુસાર, ડો. નિરાલી વસાવે, ડો. અનુજ મહેશ્વરી, ડો. દિક્ષિતાબેન ગેવરિયા અને ડો. હીનાબેન ભૂત પર જુનિયર રેસિડેન્ટ ડોકટરો સાથે દુર્વ્યવહાર અને શાબ્દિક દુર્વ્યવહાર કરવાનો આરોપ છે. જુનિયર ડોકટરોને બે કલાક સુધી એક રૂમમાં બેસાડવામાં આવ્યા હતા અને તેમને નોકર કહીને અપમાનિત કરવામાં આવ્યા હતા. ચારેયને છ મહિના માટે સસ્પેન્ડ કરવામાં આવ્યા છે.

માઇક્રોબાયોલોજી વિભાગના એચઓડી અને ત્રણ ફેકલ્ટી સભ્યોને કારણ બતાવો નોટિસ પણ જારી કરવામાં આવી છે. વહીવટીતંત્રના જણાવ્યા અનુસાર, ઘટના પહેલા કેટલાક જુનિયર ડોકટરોએ ફેકલ્ટી સમક્ષ રેગિંગ અંગે ફરિયાદ કરી હતી. હાલમાં પોલીસ તપાસ ચાલી રહી છે.