સાવલીમાં ભાજપ યુવા મોરચાના નેતા પ્રફુલસિંહ સોલંકીનો શંકાસ્પદ હાલતમાં મૃતદેહ મળતા ચકચાર

પ્રાથમિક માહિતી અનુસાર, પ્રફુલસિંહ સોલંકી પોતાના ઘરના રૂમમાં મૃત હાલતમાં મળી આવ્યાં હતા. ઘટનાની જાણ થતાં જ ડેસર પોલીસ અને ઉચ્ચ પોલીસ અધિકારીઓનો કાફલો તાત્કાલિક ઘટના સ્થળે દોડી ગયો હતો અને જરૂરી કાયદેસરની કાર્યવાહી હાથ ધરી હતી.

પરિવારના જણાવ્યાં મુજબ, પ્રફુલસિંહ છેલ્લા કેટલાક સમયથી માનસિક તણાવનો સામનો કરી રહ્યાં હતા. જો કે, આ ઘટના પાછળ પરિવારે કેટલાક સ્થાનિક લોકો સામે ગંભીર આક્ષેપો કર્યા છે. પરિવારનું કહેવું છે કે, મૃતક પ્રફુલસિંહ પર લાંબા સમયથી કેટલાક શખ્સો દ્વારા માનસિક દબાણ ઉભું કરાયું હતુ, જેના કારણે તેઓ ટેન્શનમાં રહેતા હતા.

હાલમાં પરિવાર દ્વારા કરવામાં આવેલા આ આક્ષેપોની સ્વતંત્ર રીતે પુષ્ટિ થઈ નથી, પરંતુ પોલીસે આ પાસાને ગંભીરતાથી લઈને તપાસ તેજ કરી છે. પોલીસે મૃતદેહને કબ્જે લઈને તાત્કાલિક પોસ્ટમોર્ટમ અર્થે હોસ્પિટલ ખસેડ્યો છે. 

સૂત્રોના જણાવ્યાં અનુસાર, પોલીસે મૃતકનો મોબાઈલ ફોન કબ્જે લીધો છે. પ્રફુલસિંહ છેલ્લા કેટલાક દિવસોમાં કોના-કોના સંપર્કમાં હતા અને તેમને છેલ્લે કોના ફોન આવ્યાં હતા, તે જાણવા માટે મોબાઇલ ડેટા અને કોલ ડિટેઇલ રેકોર્ડ્સની તપાસ શરૂ કરવામાં આવી છે. સ્થાનિક યુવા નેતાના મોતના પગલે ભાજપના કાર્યકરો અને સમર્થકો મોટી સંખ્યામાં ઉમટી પડ્યાં હતા.