ભ્રષ્ટાચાર વધ્યો ! ભાજપના જ MLA કેતન ઈનામદારે આ મામલે મુખ્યમંત્રીને લખવો પડ્યો પત્ર

સાવલીના ભાજપના ધારાસભ્ય કેતન ઈનામદારે મુખ્યમંત્રી ભૂપેન્દ્ર પટેલને લખેલા પત્રમાં ગંભીર બાબતોનો ઉલ્લેખ કરતા જણાવ્યું છે કે, તેમના મત વિસ્તાર સાવલી તાલુકાના પરથમપુરા ગામ પાસે કરડ નદી અને મેસરી નદી પર રૂપિયા 24 કરોડના ખર્ચે એપ્રોચ રોડ સાથે નવિન બ્રિજ બનાવવામાં આવ્યો છે, તેનું કામ નબળું છે.

આ બ્રિજ હજુ થોડા સમય પહેલા જ શરૂ કરવામાં આવ્યો છે, પરંતુ અત્યારથી જ બ્રિજ પરના રસ્તામાં મોટી તિરાડો પડી ગઈ છે અને RCC ઉખડી ગયેલું જોવા મળી રહ્યું છે, જે અત્યંત ગંભીર બાબત છે.

કેતન ઈનામદારે પત્રમાં રોષ ઠાલવતા લખ્યું છે કે, સરકાર નાગરિકોની સુવિધાઓમાં વધારો કરવા માટે હંમેશા અગ્રેસર રહે છે. પરંતુ આવા નબળા કામ કરનારા કોન્ટ્રાક્ટરો કે ભ્રષ્ટ અધિકારીઓને કારણે સરકારની પ્રતિષ્ઠાને નુકસાન પહોંચે છે. તેમણે આ બાબતે તાત્કાલિક વિજીલન્સ તપાસ કરાવીને જવાબદાર કોન્ટ્રાક્ટર તેમજ અધિકારીઓ સામે કડકમાં કડક પગલાં ભરવાની માંગ કરી છે.

નોંધનીય છે કે, ધારાસભ્ય કેતન ઈનામદારે અગાઉ 5 મહિના પહેલા પણ મુખ્યમંત્રીને પત્ર લખીને અધિકારીઓ જનતાના કામ ન કરતા હોવાની વાત કરી હતી.