સુરત: ખાડી પૂરથી નુકસાન છતાં વળતર ન મળતાં આક્રોશ, મહિલાઓએ કલેક્ટર કચેરીએ ધરણા ધર્યા

ગોડાદરા અને ડીંડોલીની 15થી વધુ સોસાયટીઓ જેવી કે રણછોડ નગર, વૃંદાવન, દેવીદર્શન, સાંઈ ધામ, પ્રિયંકા-1 અને પ્રિયંકા-2 સતત ત્રણ દિવસ સુધી પૂરના પાણીમાં ગરકાવ રહી હતી. ઘરોમાં પાણી ઘૂસી જવાથી ઘરવખરી અને કિંમતી સામાન સંપૂર્ણપણે પલળી જતાં લોકોને મોટું આર્થિક નુકસાન વેઠવાનો વારો આવ્યો હતો. શહેરમાં અન્ય અસરગ્રસ્તોને સહાય મળી ગઈ હોવા છતાં આ સોસાયટીઓ સાથે તંત્ર દ્વારા ભેદભાવ કરાતો હોવાનો મહિલાઓએ આરોપ લગાવ્યો હતો.

સ્થાનિક મહાનગરપાલિકા અને કલેક્ટર વિભાગમાં અવારનવાર રજૂઆતો કરવા છતાં માત્ર આશ્વાસનો મળતાં આજે 50થી વધુ મહિલાઓ સુરત કલેક્ટર કચેરી ખાતે ધસી આવી હતી. અધિકારીઓ તરફથી સંતોષકારક જવાબ ન મળતાં રોષે ભરાયેલી મહિલાઓએ કચેરી પરિસરમાં જ બેસીને તંત્ર વિરુદ્ધ જોરદાર સૂત્રોચ્ચાર કરી ધરણા શરૂ કર્યા હતા. મહિલાઓએ સ્પષ્ટ ચિમકી આપી છે કે જ્યાં સુધી તમામ અસરગ્રસ્ત પરિવારોને હકની કેશ ડોલ ચૂકવવામાં નહીં આવે ત્યાં સુધી આ વિરોધ પ્રદર્શન ચાલુ રહેશે.