સુરતમાં મફત નાસ્તો ન આપતાં ટી -સેન્ટર સંચાલક પર 5 પોલીસકર્મીઓનો અમાનવીય અત્યાચાર

પીડિત વેપારીના જણાવ્યાં અનુસાર, લિંબાયત પોલીસ મથકના ડી-સ્ટાફના કર્મચારીઓ રોજ તેમની દુકાનેથી ₹700 થી ₹800નો સામાન (ચા, પાણી, એનર્જી ડ્રિંક, સિગરેટ, માવો) મફતમાં લઈ જતા હતા. આર્થિક નુકસાન વધતાં જ્યારે પૈસા માગ્યા, ત્યારે પોલીસે દુશ્મનાવટ રાખી 13 જુલાઈની રાત્રે દુકાન બંધ કરતી વખતે જાતિસૂચક અપશબ્દો બોલી હુમલો કર્યો હતો.

સામે આવેલા CCTV ફૂટેજમાં પોલીસની અમાનવીયતા સ્પષ્ટ દેખાય છે. જેમાં રાત્રે 8:58 વાગ્યે બે પોલીસકર્મીઓ મનોજનો પીછો કરી તેને પકડી પાડે છે, વાળ ખેંચીને દંડા વડે બેફામ માર મારે છે. રાત્રે 9:50 વાગ્યે વધુ બે પોલીસકર્મીઓ દંડા સાથે પહોંચે છે અને જાળી પકડીને ઊભેલા ટી સેન્ટરના સંચાલક પર હુમલો ચાલુ રાખે છે. રાત્રે 10:45 વાગ્યે પાંચમો પોલીસકર્મી આવી પહોંચે છે અને તમામે ભેગા મળી મનોજને પગથી ઢસડીને, ખભા પર પગ મૂકી માર મારતાં લઈ જાય છે.

વેપારીનો આક્ષેપ છે કે લિંબાયત પોલીસ સ્ટેશનના ડી-સ્ટાફ રૂમમાં તેમને ભોંયતળિયે ઊંધા સુવડાવી, મોં અને પગ દબાવીને તળિયા તેમજ શરીરના પાછળના ભાગે 250થી વધુ દંડા ફટકારવામાં આવ્યા હતા. તમામ કાયદેસર લાઈસન્સ હોવા છતાં દોઢ કલાક સુધી અમાનુષી અત્યાચાર ગુજારાયો હતો.

મનોજે સુરત પોલીસ કમિશનર કચેરી ખાતે પેનડ્રાઈવ અને વીડિયો રેકોર્ડિંગ સાથે પુરાવા રજૂ કર્યા હતા. DCP દ્વારા તપાસના આદેશ અપાયા હોવા છતાં, અરજી ફરી તપાસ માટે લિંબાયત પોલીસને જ સોંપી દેવાતાં આરોપીઓ જ તપાસકર્તા બની ગયા હતા. સ્થાનિક સ્તરે ન્યાય ન મળતાં મનોજે હાઈકોર્ટમાં પોલીસ કમિશનર, DCP, PI, PSI અને ડી-સ્ટાફ સામે પિટિશન દાખલ કરી છે.

હાઇકોર્ટમાં ગયા બાદ પોલીસ દ્વારા તેમને સતત જાનથી મારી નાખવાની ધમકીઓ મળી રહી છે અને તેમના ભાઈનું પણ અપહરણ કરવાનો પ્રયાસ કરાયો હોવાનો પીડિતે આક્ષેપ કર્યો છે.