ભાજપ નેતાના પુત્રનો આપઘાત: મેં તારી પર ક્યારેય હાથ નથી ઉપાડ્યો કહીને ગળેફાંસો ખાધો

આ ઘટના બાગપત કોતવાલી વિસ્તારના દેશરાજ મહોલ્લાની છે. અહીં રહેતા ભાજપ નેતા સહદેવના પુત્ર નીરજના લગ્ન ત્રણ વર્ષ પહેલાં ગૌરીપુર ગામની યુવતી સાથે થયા હતા. લગ્ન બાદથી જ બંને વચ્ચે નાની- મોટી બાબતે વિવાદ ચાલતો હતો. નીરજની પત્ની સગર્ભા હોવાથી પિયરમાં રહેતી હતી. નીરજ તેને પરત લાવવા સતત પ્રયાસ કરી રહ્યો હતો, પરંતુ પત્ની સાસરે આવવા માટે જરાય તૈયાર નહોતી.

ઘટનાના બે દિવસ પહેલાં વિવાદ વધતાં પત્ની પક્ષે પોલીસને જાણ કરી હતી, જેના પગલે નીરજને પોલીસ સ્ટેશને પણ જવું પડ્યું હતું. આ કાર્યવાહી બાદ પણ પત્ની પોતાની જીદ પર અડી રહી હતી.

પત્નીને મનાવવા માટે ફોન પર વાત કરતી વખતે ભાંગી પડેલા નીરજે પોતાનું દર્દ વ્યક્ત કરતાં કહ્યું હતું: મેં તને આજ સુધી એક થપ્પડ પણ નથી મારી, ક્યારેય હાથ પણ નથી ઉપાડ્યો. આટલી વિનંતી છતાં પત્નીએ સાથે આવવાની સાફ ના પાડી દેતાં નીરજ ભારે માનસિક તણાવમાં આવી ગયો હતો. તેણે રૂમમાં પોતાની જાતને બંધ કરીને ફાંસો લગાવી લીધો હતો.

ઘટનાની જાણ થતાં જ પોલીસે સ્થળ પર પહોંચી મૃતદેહને પોસ્ટમોર્ટમ માટે મોકલી આપ્યો હતો. પોલીસે પરિવારજનો અને આસપાસના લોકોની પૂછપરછ હાથ ધરીને દંપતી વચ્ચેના વિવાદ અંગે ઊંડાણપૂર્વક તપાસ શરૂ કરી છે.