કેનેડા: ટોરોન્ટોના સ્ટ્રીટ ફેસ્ટિવલમાં આડેધડ ગોળીબાર, 2 લોકોનાં મોત

ટોરોન્ટો પોલીસ સર્વિસના જણાવ્યાં અનુસાર, આ ઘટના શનિવારે રાત્રે 8 વાગ્યા પછી સેન્ટ ક્લેર એવન્યુ વેસ્ટ અને આર્લિંગ્ટન એવન્યુ નજીક બની હતી. ગોળીબાર શરૂ થતાં જ નાસભાગ મચી ગઈ હતી. સૂચના મળતા જ મોટી પોલીસ ટુકડી અને કટોકટી સેવાઓ ઘટના સ્થળે પહોંચી ગઈ હતી. પોલીસને ગોળીબારમાં 5 લોકો ઘાયલ થયા હોવાનું જાણવા મળ્યું છે. બે લોકોને મૃત જાહેર કરવામાં આવ્યાં છે. જ્યારે ત્રણ ઘાયલોને તાત્કાલિક હોસ્પિટલમાં ખસેડવામાં આવ્યાં છે.

પ્રારંભિક તપાસ બાદ, ટોરોન્ટો પોલીસે પરિસ્થિતિને અત્યંત ગંભીર ગણાવી છે. પોલીસે સમગ્ર વિસ્તારને ઘેરી લીધો છે, અને હુમલાખોરને શોધવા માટે મોટા પાયે શોધખોળ હાથ ધરી છે.

સુરક્ષાના હિતમાં પોલીસે જનતાને કડક ચેતવણી આપી છે અને તે વિસ્તારથી દૂર રહેવાની અપીલ કરી છે. પોલીસ સક્રિયપણે તપાસ કરી રહી છે, જોકે  હુમલા પાછળનો હેતુ હજુ સ્પષ્ટ થયો નથી. સત્તાવાળાઓએ હુમલાને કારણ કે હુમલાખોરના ઈરાદા અંગે હજુ સુધી કોઈ સત્તાવાર વિગતો જાહેર કરી નથી, તેમજ કોઈ શંકાસ્પદ વ્યક્તિની ધરપકડની પુષ્ટિ કરવામાં આવી નથી. અધિકારીઓ સાક્ષીઓની પૂછપરછ કરી રહ્યા છે અને ઘટનાના સીસીટીવી ફૂટેજની તપાસ કરી રહ્યા છે.