પંજાબના મંત્રી સંજીવ અરોરાની ED દ્વારા ધરપકડ: ચંડીગઢમાં દરોડા બાદ સીએમ ભગવંત માન ભાજપ પર ભડક્યા

બીજી તરફ, આ દરોડા પર રોષે ભરાયેલા મુખ્યમંત્રી ભગવંત માને ટ્વીટ કરીને ભાજપ પર નિશાન સાધ્યું છે. સીએમએ એક્સ  પર લખ્યું, આજે ફરી ભાજપની ED સંજીવ અરોરાના ઘરે આવી છે. એક વર્ષમાં આ ત્રીજી વખત છે જ્યારે ભાજપની ED તેમના ઘરે આવી છે, અને એક મહિનામાં બીજી વખત. તેમ છતાં તેમને કંઈ મળ્યું નથી. હું મોદીજીને કહેવા માંગુ છું કે પંજાબ ગુરુઓની ધરતી છે; ઔરંગઝેબ પણ તેને ઝુકાવી શક્યો નહોતો. આ ભગતસિંહની ધરતી છે, જેમણે અંગ્રેજો સામે ક્યારેય માથું નહોતું નમાવ્યું; તેથી પંજાબ મોદીની ચાલ સામે ક્યારેય ઝુકશે નહીં. પંજાબ, ED અને ભાજપના આ અનૈતિક ગઠબંધનનો અંત લાવશે.

સંગરુરમાં પત્રકારો સાથેની વાતચીતમાં ભગવંત માને ચેતવણી આપતા કહ્યું કે પંજાબના ભાઈચારાને તોડવાના ભાજપના મનસૂબા ક્યારેય સફળ થશે નહીં અને પંજાબ સાથે થઈ રહેલા અન્યાયનો પંજાબીઓ જડબાતોડ જવાબ આપશે.

મુખ્યમંત્રીએ ભાજપની કાર્યશૈલી પર આકરા પ્રહારો કરતા કહ્યું કે, જ્યારે પણ ચૂંટણી નજીક આવે છે ત્યારે ભાજપ બોમ્બ વિસ્ફોટ, માનહાનિની નોટિસ અને EDના દરોડા જેવા હથકંડાઓનો સહારો લે છે. તેમણે ઉમેર્યું કે ભાજપ માનહાનિની નોટિસ મોકલીને ડરાવવા માંગે છે, પરંતુ અમને તેની કોઈ પરવા નથી. મોદી સરકારે પોતાની સરમુખત્યારશાહી અને આવા હીન હથકંડા બંધ કરવા જોઈએ.