PoK માં પ્રદર્શનકારીઓ પર ગોળીબાર, 11 લોકોનાં મોત

સમાચાર એજન્સી રોઇટર્સના જણાવ્યાં અનુસાર, પરિસ્થિતિ ત્યારે વધુ વણસી જ્યારે JAAC સમર્થકો હોસ્પિટલના શબઘરની બહાર ભેગા થયા હતા, જ્યાં અગાઉ ગોળીબારમાં મૃત્યું પામેલા સંગઠનના એક કાર્યકર્તાના મૃતદેહને રાખવામાં આવ્યો હતો. પોલીસ અને અર્ધલશ્કરી દળોએ મોટી સંખ્યામાં પ્રદર્શનકારીઓને વિખેરવા માટે પ્રતિક્રિયા આપી હતી, જેના કારણે હિંસક પરિસ્થિતિ સર્જાઈ હતી. 

પૂંછ સેક્ટરમાં હિંસા દરમિયાન ચાર પોલીસકર્મીઓ અને એક રાહદારીનું મોત થયું હતું. તેમણે દાવો કર્યો હતો કે કેટલાક તોફાનીઓએ સુરક્ષા દળો પર ગોળીબાર કર્યો હતો. જવાબી કાર્યવાહીમાં છ પ્રદર્શનકારીઓ માર્યા ગયા છે. 23 સુરક્ષા કર્મચારીઓ અને લગભગ 50 પ્રદર્શનકારીઓ ઘાયલ થયા છે. ઘણા લોકોની અટકાયત પણ કરવામાં આવી છે. 

જો કે, સ્થાનિક રહેવાસીઓ અને JAAC સમર્થકોએ સરકારના દાવાઓ પર સવાલ ઉઠાવ્યા છે. તેમનું કહેવું છે કે નાગરિકોના મૃત્યું અને ઇજાઓનો વાસ્તવિક આંકડો સત્તાવાર આંકડા કરતા વધારે હોઈ શકે છે.

વિરોધ શા માટે ફાટી નીકળ્યો છે ?

પાકિસ્તાન અધિકૃત કાશ્મીર (PoK) માં તાજેતરના વિરોધ પ્રદર્શનોનું મુખ્ય કારણ રાજ્ય વિધાનસભામાં 12 અનામત બેઠકો અંગેનો નિર્ણય છે. 45 સભ્યોની વિધાનસભામાં આ બેઠકો એવા શરણાર્થીઓ માટે અનામત છે જેઓ કાશ્મીર સાથે સંબંધ હોવાનો દાવો કરે છે પરંતુ હાલમાં પાકિસ્તાનના અન્ય ભાગોમાં રહે છે.

JAAC અને અન્ય સ્થાનિક સંગઠનોનો આરોપ છે કે આ વ્યવસ્થા સ્થાનિક રાજકીય પ્રતિનિધિત્વને નબળું પાડશે અને બહારનો પ્રભાવ વધારશે. તેમનો દલીલ છે કે પ્રદેશના ભવિષ્ય અંગેના નિર્ણયો ફક્ત રહેવાસીઓ પર જ આધાર રાખવો જોઈએ. સંગઠન લાંબા સમયથી આ માંગણી માટે ઝુંબેશ ચલાવી રહ્યું છે.

આ સંગઠને ફુગાવો, વીજળીની અછત, બેરોજગારી, નબળી વહીવટી વ્યવસ્થા અને પ્રદેશની રાજકીય ઉપેક્ષા જેવા મુદ્દાઓ પણ ઉઠાવ્યા છે. છેલ્લા બે વર્ષમાં, JAAC એ લોટ અને વીજળીના વધતા ભાવ સામે અનેક મોટા વિરોધ પ્રદર્શનોનું આયોજન કર્યું છે. આ વિરોધ પ્રદર્શનો ઘણીવાર સુરક્ષા દળો સાથે અથડામણોમાં પરિણમ્યા છે.

9 જૂનના રોજ પ્રસ્તાવિત બંધ ફક્ત અનામત બેઠકો સામેના વિરોધ પૂરતો મર્યાદિત ન હતો. વિરોધીઓ JAAC પર પ્રતિબંધ, ઇન્ટરનેટ પ્રતિબંધ અને સંગઠનના એક નેતાની હત્યાનો પણ વિરોધ કરવા માંગતા હતા. ગયા અઠવાડિયે પ્રાદેશિક વહીવટીતંત્રે JAAC ને આતંકવાદ વિરોધી કાયદા હેઠળ પ્રતિબંધિત સંગઠન જાહેર કર્યું હતું. સરકારનો આરોપ છે કે સંગઠનની પ્રવૃત્તિઓ કાયદો અને વ્યવસ્થા માટે ખતરો ઉભો કરી રહી હતી. ત્યારથી આ પ્રદેશમાં તણાવ સતત વધી રહ્યો છે.