દેશના અનેક રાજ્યોમાં આગામી બે- ત્રણ દિવસ ભારે વરસાદનું એલર્ટ: આસામમાં પૂરે લીધો 68 લોકોનો ભોગ

હવામાન વિભાગના જણાવ્યા અનુસાર, બંગાળની ખાડી પર સર્જાયેલું લો-પ્રેશર વધુ મજબૂત બનીને ડિપ્રેશનમાં ફેરવાઈ ગયું છે. આગામી 24 કલાક દરમિયાન તે વધુ મજબૂત થઈને ઉત્તર ઓડિશા અને પશ્ચિમ બંગાળના કિનારાઓને પાર કરે તેવી સંભાવના છે. તેની અસ હેઠળ 29 જુલાઈ સુધી સુંદરગઢ, ક્યોંઝર અને મયૂરભંજ જિલ્લામાં અત્યંત ભારે વરસાદની શક્યતા વ્યક્ત કરતા રેડ અલેર્ટ જાહેર કરવામાં આવ્યું છે. 

આસામમાં પૂરની સ્થિતિ હજુ પણ ખૂબ જ નાજુક બનેલી છે. રવિવારે વડાપ્રધાન નરેન્દ્ર મોદીએ કેન્દ્રીય મંત્રી સરબાનંદ સોનોવાલ સાથે ટેલિફોનિક વાતચીત કરીને પરિસ્થિતિની માહિતી મેળવી હતી. સોનોવાલ પૂરની સ્થિતિની સમીક્ષા કરવા માટે હાલ રાજ્યના પ્રવાસે છે.

હિમાચલ પ્રદેશના લાહૌલ-સ્પીતિ જિલ્લાની મયાડ ઘાટીના ધાંધલ નાળા વિસ્તારમાં વાદળ ફાટ્યું હતું. આ ઘટનાને કારણે પહાડી નાળામાં અચાનક પૂર આવ્યું હતું, જેમાં એક પુલ અને રસ્તો તણાઈ ગયા હતા. વાદળ ફાટવાના કારણે મયાડ ઘાટીના સાત ગામોનો સંપર્ક પૂર્ણપણે તૂટી ગયો છે.