ગુવાહાટીમાં પતિએ ક્રૂરતાથી પત્નીની કરી હત્યા, આંગળીઓ કાપી નાખી અને કપાયેલું માથું ફ્રીજમાં રાખ્યું

દિસપુરઃ આસામના ગુવાહાટીથી એક ચોંકાવનારા સમાચાર સામે આવ્યા છે, જ્યાં લગ્નના થોડા મહિના પછી એક નવપરિણીત મહિલાની તેના પતિએ હત્યા કરી નાખી છે. આરોપી પતિએ તેની પત્નીની આંગળીઓ કાપી નાખી અને તેનું કપાયેલું માથું રેફ્રિજરેટરમાં મૂકી દીધું હતું.

જ્યારે પડોશીઓએ દુર્ગંધની ફરિયાદ કર્યાં બાદ પોલીસ એપાર્ટમેન્ટમાં પહોંચી ત્યારે સમગ્ર ઘટનાનો પર્દાફાશ થયો હતો. ફ્લેટનું તાળું તોડ્યું તો અહીંથી મહિલાનું માથાં વગરનું શરીર મળ્યું હતું, તેની આંગળીઓ પણ અડધી કપાયેલી હતી અને તેનું શરીર સડવા લાગ્યું હતું.

મૃતક મહિલાની ઓળખ રિયા તાલુકદાર તરીકે થઈ છે. ઘરની તપાસ કરતાં પોલીસે રેફ્રિજરેટરમાં રાખેલી પોલીથીન બેગમાં મહિલાનું માથું મળી આવ્યું હતું. અહેવાલો અનુસાર, થોડા મહિના પહેલા લગ્ન થયા ત્યારથી દંપતી એક એપાર્ટમેન્ટમાં રહેતું હતુ, પડોશીઓએ પોલીસને જણાવ્યું હતું કે દંપત્તિના ફોન બંધ હતા. તેમને છેલ્લે શુક્રવારે જોયા હતા.

ઘટના પછી ફરાર પતિએ રવિવારે રાત્રે પોલીસ સમક્ષ આત્મસમર્પણ કર્યું હતું અને ત્યાર બાદ તેની ધરપકડ કરવામાં આવી હતી. આ કેસની તપાસ ચાલુ છે. પોલીસ આ ઘટનામાં અન્ય વ્યક્તિઓની સંડોવણીની પણ તપાસ કરી રહી છે.