• ત્રણ દિવસ પહેલાં જ પોતાની માતાને તેમની દાદીના ઘરે મોકલી દીધા હતા
  • ઘટના પાછળનું ચોક્કસ કારણ જાણી શકાયું નથી

બેંગ્લોરઃ કર્ણાટકના મૈસુરમાં એક વ્યક્તિએ પોતાની પત્ની અને બે બાળકોની હત્યા કર્યા બાદ ગળે ફાંસો ખાઈને આત્મહત્યા કરી લીધી હતી.  પોલીસે જણાવ્યું કે આ ઘટના જિલ્લાના હુનસુર શહેરમાં સ્થિત ન્યુ મારુતિ લેઆઉટમાં બની હતી. પોલીસના જણાવ્યાં અનુસાર, હરીશે પોતાની પત્ની અને બાળકોની હત્યા કર્યા બાદ ગળે ફાંસો ખાઈ  લીધો હતો.

તેણે એક સ્યૂસાઇડ નોટ પણ છોડી હતી, જેમાં લખ્યું હતું કે તે ઉપરના રૂમમાં લટકાયેલી હાલતમાં મળશે. કથિત નોટમાં તેણે લોકરમાં રાખેલા મિલકત સંબંધિત કાગળો સહિતના દસ્તાવેજોનો ઉલ્લેખ કર્યો હતો અને ચાવીઓ ક્યાં રાખી છે તેમજ તે દસ્તાવેજો નોટમાં દર્શાવેલ વ્યક્તિને સોંપી દેવામાં આવે તેમ લખ્યું છે.

પોલીસ અધિકારીએ જણાવ્યું કે પ્રાથમિક તપાસમાં બહાર આવ્યું છે કે તેણે ત્રણ દિવસ પહેલાં જ પોતાની માતાને તેમની દાદીના ઘરે મોકલી દીધા હતા. હુનસુર નગર પોલીસે ઘટના સ્થળની મુલાકાત લઈને તપાસ હાથ ધરી હતી. પોલીસે જણાવ્યું કે આ ઘટના પાછળનું ચોક્કસ કારણ જાણવાના પ્રયાસો થઈ રહ્યાં છે અને આગળની તપાસ ચાલુ છે.