એફઆઈઆરમાં નોંધાયેલા કેતનના પિતા વિશાલ અગ્રવાલના નિવેદન મુજબ, બંને પરિવારો વચ્ચે એક કોમન કડી હતા નરેન્દ્ર મિત્તલ, તેઓ જ સિયાના લગ્નનું માગું તેમના પરિવાર પાસે લાવ્યાં હતા અને કહ્યું હતું કે સિયા તેમના જીજાજીની પુત્રી છે. અગાઉ એવા સમાચાર આવ્યાં હતા કે ગોયલ અને અગ્રવાલ પરિવાર સંબંધી હતા. બંને પરિવારો વચ્ચે નરેન્દ્ર મિત્તલ મુખ્ય કડી હતા. નરેન્દ્ર મિત્તલના બહેનના લગ્ન પ્રવીણ ગોયલ સાથે થયા હતા, તેથી તેઓ સિયાના મામા અને વિશાલ અગ્રવાલના પિતરાઈ ભાઈ થતા હતા અને બંને પરિવારોમાં તેમને અંકલ માનવામાં આવતા હતા.
પહેલેથી જ પારિવારિક સંબંધ હોવાને કારણે અગ્રવાલ પરિવાર આ સંબંધ માટે માની ગયો હતો. સિયાને મળ્યાં પછી તેમને તે ગમી ગઈ અને ફેબ્રુઆરીમાં પુણેના બંડ ગાર્ડનમાં સગાઈની વિધિ થઈ હતી. હત્યાની તપાસથી જાણવા મળ્યું છે કે સગાઈના થોડા સમય બાદ જ કેતને તેના પિતાને પૂછ્યું હતું કે શું તેમણે સિયા ગોયલના બેકગ્રાઉન્ડની બરાબર તપાસ કરી છે કે નહીં ? તેમને ખાતરી આપવામાં આવી હતી કે નરેન્દ્ર મિત્તલે બધું જ ચેક કરી લીધું છે અને ચિંતા કરવાની કોઈ વાત નથી. સૂત્રોના જણાવ્યાં અનુસાર, કેતને પિતાના ભરોસાને માની લીધો અને શાંત રહેવાનું નક્કી કર્યું.
ત્યારબાદ જ્યારે પરિવાર મુંબઈ એરપોર્ટ પરથી પ્રી-વેડિંગ શૂટ માટે ઈન્ડોનેશિયા જવાની તૈયારી કરી રહ્યો હતો, ત્યારે કેતનનો પાસપોર્ટ ખોવાઈ ગયો. આ ઘટના પછી તેણે ફરીથી તેના પિતાને સિયા વિશે સવાલ કર્યો હતો. સૂત્રોનાં જણાવ્યા મુજબ, કેતને તેમને કહ્યું કે સિયા નાની-નાની વાતો પર અવારનવાર ઝઘડો કરે છે અને પૂછ્યું કે શું ખરેખર તેના બેકગ્રાઉન્ડની તપાસ કરવામાં આવી હતી ?
કેતને જણાવ્યું કે જ્યારે તે તેની સાથે હોય છે ત્યારે પણ અવારનવાર ચેતન ચૌધરી વિશે વાતો કરતી હતી. પછી તેણે તેના પિતાને પૂછ્યું, શું સિયાનું કોઈની સાથે અફેર ચાલી રહ્યું છે ? વિશાલ અગ્રવાલે ત્રીજી વખત પોતાના પુત્રને ખાતરી આપી કે સિયા તેમના મોટા પરિવારનો જ એક ભાગ છે અને નરેન્દ્ર મિત્તલ દ્વારા બધું જ બરાબર વેરિફાય કરી લેવામાં આવ્યું છે, તેથી તેને ચિંતા કરવાની જરૂર નથી.
