બેંગલુરુથી હોસુર જતી કારમાંથી રૂ. 9 કરોડ જપ્ત, ઘરમાંથી પણ રૂ. 1.3 કરોડ મળ્યાં, આવકવેરા વિભાગની કાર્યવાહી

સિટી પોલીસ પાસેથી મળેલી માહિતી મુજબ, મંગળવારે, KL 20- T 8629 નંબરની ક્રેટા કાર બેંગલુરુથી તમિલનાડુના હોસુરમાં ગેરકાયદેસર રીતે પૈસા લઈ જઈ રહી હતી.

બેંગલુરુ સિટી ઇન્કમ ટેક્સ ડિપાર્ટમેન્ટ (યુનિટ 22) ના ડેપ્યુટી ડિરેક્ટર જગદીશના અનુરોધ પર ઇલેક્ટ્રોનિક સિટી પોલીસ સ્ટેશનની નાઇટ પેટ્રોલ ટીમે હોસુર રોડ પર બેંગલુરુ એલિવેટેડ ટોલવે લિમિટેડ ટોલ પ્લાઝા પાર કર્યા પછી સિગ્નલ પર કારને રોકી હતી અને તેને પોલીસ સ્ટેશન લાવવામાં આવી હતી. કાર અને તેમાં સવાર બે લોકોને પોલીસ સ્ટેશનમાં ઇન્કમ ટેક્સ અધિકારીઓની ટીમને સોંપવામાં આવ્યાં હતા.

આવકવેરા અધિકારીઓએ કારની તપાસ કરીને કુલ રૂ. 9 કરોડ રોકડા જપ્ત કર્યા છે. ધરપકડ કરાયેલા લોકોમાં 42 વર્ષીય સચિન પણ છે, જે તમિલનાડુના થુથુકુડીમાં સિંધુ જ્વેલર્સની દુકાનનો માલિક છે. આવકવેરા અધિકારીઓએ પૂછપરછ માટે બે વ્યક્તિઓની અટકાયત કરી છે. તમિલનાડુના આવકવેરા અધિકારીઓએ તેમના ઘરેથી રૂ.1.3 કરોડ જપ્ત કર્યા છે.  

જે કારમાંથી રૂ. 9 કરોડ જપ્ત કરવામાં આવ્યાં હતા તે બેંગલુરુથી હોસુર, તમિલનાડુ જઈ રહી હતી. આ કાર તિરુવનંતપુરમ જિલ્લાના નેય્યાટ્ટીંકરા વિસ્તારમાં રજીસ્ટર થયેલ છે. કારની અંદર એક સુટકેસમાં નોટો મળી આવી હતી.