નેપાળમાં એક જ ઘરમાંથી 23 મૃતદેહો મળી આવ્યાં, 4000 લોકો હજુ પણ ગુમ, મૃત્યુઆંક 962 પર પહોંચ્યો

નુવાકોટ જિલ્લાના વેત્રાવંતી ખાતે બચાવ કામગીરી દરમિયાન, એક જ ઘરમાંથી 23 મૃતદેહો મળી આવ્યાં છે. નેપાળના પૂરની અસર ભારતીય નદીઓમાં પણ જોવા મળી રહી છે. ભારતીય સરહદ પર વહેતી ગંડક નદીમાં 23 મૃતદેહો મળી આવ્યાં છે. ભારત હવે આ મૃતદેહો નેપાળી એજન્સીઓને સોંપવાની તૈયારી કરી રહ્યું છે

નેપાળમાં આવેલા પૂરમાં મૃતદેહોની સંખ્યા દરરોજ વધી રહી છે. આ આફતને ઘણા દિવસો વીતી ગયા છે, પરંતુ ગુમ થયેલા લોકોની સંખ્યા હજુ પણ હજારોમાં છે. કુલ મળીને લગભગ 4,000 લોકો હજુ પણ ગુમ થયાના અહેવાલ છે. રાસુવા જિલ્લાના ઉત્તરગયા ગામમાં લગભગ 350 વિદ્યાર્થીઓ ગુમ છે.

ત્રિશુલી 3A હાઇડ્રોપાવર પ્રોજેક્ટમાં 40 થી 42 એન્જિનિયરો પણ ફસાયેલા છે. છઠ્ઠા દિવસે પણ બચાવ કામગીરી શરૂ થઈ નથી. એવું કહેવાય છે કે આપત્તિ સમયે પ્રોજેક્ટમાં આશરે 40 થી 42 એન્જિનિયરો કામ કરી રહ્યા હતા. ત્રિશુલી 3B હાઇડ્રોપાવર પ્રોજેક્ટ પણ આવી જ પરિસ્થિતિનો સામનો કરી રહ્યો છે. 

ત્રિશુલી 3B હાઇડ્રોપાવર પ્રોજેક્ટમાં હજુ પણ 118 લોકો ફસાયેલા છે. ત્રિશુલી 3B હાઇડ્રોપાવર પ્રોજેક્ટમાં ફસાયેલા લોકોમાં એન્જિનિયરો, અન્ય અધિકારીઓ અને કામદારોનો સમાવેશ થાય છે. તેમની સાથે કોઈ સંપર્ક થયો નથી.

નેપાળના પૂરગ્રસ્ત વિસ્તારોમાં રોગચાળાનો ભય વધુ ઘેરો બન્યો છે. દુર્ઘટનાના 7 દિવસ પછી, દુર્ગંધ ફેલાવા લાગી છે. આ માટે કાટમાળ અને કળણમાં દટાયેલા મૃતદેહોના સડી જવાને જવાબદાર ગણવામાં આવી રહ્યું છે. આ સ્થિતિમાં એજન્સીઓ સામે હવે બચાવ કામગીરી, સ્વચ્છતા અને અસરગ્રસ્ત વિસ્તારોમાં રોગચાળાના ફેલાવાને રોકવાના પડકારનો સામનો કરવો પડી રહ્યો છે.