અમરેલી: ભાજપે બે પંચાયતો ગુમાવી, લાઠીમાં AAP સાથે અણધાર્યો ખેલ થઇ ગયો

લાઠી તાલુકા પંચાયતમાં પ્રમુખ પદ OBC મહિલા માટે અનામત હતું. ભાજપ પાસે આ બેઠક પર કોઈ ચૂંટાયેલા OBC મહિલા સભ્ય ન હોવાથી, કોંગ્રેસ અહીં પોતાની પક્કડ બનાવવા માટે પૂરેપૂરી સક્રિય થઈ હતી. પરંતુ છેલ્લી ઘડીએ રાજુલાના ધારાસભ્ય હીરા સોલંકીએ મોટો રાજકીય દાવ ખેલ્યો હતો. આ આખું ઓપરેશન હીરા સોલંકીના જમાઈ ચેતન શિયાળ દ્વારા પાર પાડવામાં આવ્યું હોવાની ચર્ચા છે.

કોંગ્રેસને સત્તાથી દૂર રાખવા માટે ભાજપે મોટું મન રાખીને આમ આદમી પાર્ટીના કોળી સમાજના વિજેતા ઉમેદવાર રમીલાબેન પૂનતિયાને પ્રમુખ પદ માટે ટેકો જાહેર કરી દીધો હતો. ભાજપના સભ્યોના અણધાર્યા સમર્થનથી રમીલાબેન લાઠી તાલુકા પંચાયતના પ્રમુખ બન્યાં અને કોંગ્રેસના હાથમાં આવેલો કોળિયો છીનવાઈ ગયો હતો.

બીજી તરફ બગસરા તાલુકા પંચાયતની ચૂંટણીમાં આમ આદમી પાર્ટીએ શાનદાર પ્રદર્શન કરતા સ્પષ્ટ બહુમતી મેળવી લીધી છે અને ભાજપને સત્તા પરથી બહાર ધકેલી દીધું છે. સત્તા ગુમાવ્યાં બાદ હવે ભાજપે અહીં વિપક્ષની બેન્ચ પર બેસવાનો વારો આવ્યો છે.

લીલિયા તાલુકા પંચાયતમાં પણ ભાજપને કારમો ફટકો પડ્યો છે. અહીં કોંગ્રેસે બહુમતીના જોરે સત્તા પોતાના હસ્તક કરી લીધી છે. બગસરાની જેમ લીલિયામાં પણ હવે ભાજપે શાસક પક્ષમાંથી હટીને વિરોધ પક્ષની ભૂમિકા ભજવવી પડશે.