ટિકિટ જોઈતી હોય તો માલિશ કરો, અમરેલીના ખાંભામાં ભાજપના નેતાનો કાર્યકર પાસે મસાજ કરાવતો વીડિયો વાયરલ

ભાજપ દ્વારા પંડિત દીનદયાળ ઉપાધ્યાય પ્રશિક્ષણ મહાઅભિયાન અંતર્ગત જિલ્લાવાર સંગઠનના વિવિધ કાર્યક્રમો યોજાઈ રહ્યાં છે. આ અંતર્ગત ધારી વિધાનસભા ક્ષેત્રમાં આવતા ખાંભા તાલુકા મંડળ દ્વારા ધારી ગીરમાં આવેલા લાયનડેન રિસોર્ટ ખાતે બે દિવસીય પ્રશિક્ષણ વર્ગનું આયોજન કરવામાં આવ્યું હતું. આ વર્ગમાં મોટી સંખ્યામાં ભાજપના કાર્યકરો, હોદ્દેદારો અને પદાધિકારીઓ હાજર રહ્યા હતા.

વાયરલ થયેલો આ વીડિયો ચોક્કસ ક્યાનો છે તેની સત્તાવાર પુષ્ટિ થઈ નથી, પરંતુ કાર્યકરોમાં વ્યાપક ચર્ચા છે કે આ વીડિયો પ્રશિક્ષણ વર્ગ દરમિયાન રિસોર્ટના જ એક રૂમમાં શૂટ કરવામાં આવ્યો છે.

સોશિયલ મીડિયામાં વહેતા થયેલા આ વીડિયોમાં જોઈ શકાય છે કે, એક સામાન્ય કાર્યકર ખાંભા તાલુકા પંચાયતના કારોબારી ચેરમેન ભાવેશ જાદવના પગની માલિશ કરી રહ્યો છે. આ દરમિયાન ભાવેશ જાદવ કાર્યકરને સરપંચ બનાવવાની ગેરંટી આપે છે, જેનાથી ઉત્સાહમાં આવી ગયેલો કાર્યકર પગ દબાવતાં દબાવતાં બોલે છે કે, પ્રાણ જાય પણ વચન ન જાય, મને ભાવેશ ભાઈએ ગ્રામ પંચાયતનું વચન આપ્યું છે અને આપણે બહુમતિથી જીતીશું. કેટલા વર્ષોથી સેવા કરીએ છીએ જેનો લાભ મળશે.

આ વીડિયોમાં સત્તાના નશા અને પદની લાલચનો ખુલ્લો ખેલ જોવા મળી રહ્યો છે, જેના કારણે પક્ષની છબી ખરડાતાં ભારે વિવાદ જાગ્યો છે. આ વિવાદ અંગે જ્યારે ખાંભા તાલુકા પંચાયતના કારોબારી ચેરમેન ભાવેશ જાદવનો સંપર્ક કરવામાં આવ્યો ત્યારે તેમણે રિસોર્ટની ઘટનાનો સાવ ઇનકાર કર્યો હતો. તેમણે પોતાનો બચાવ કરતા જણાવ્યું કે, આ વીડિયો ધારી ગીરના રિસોર્ટનો નથી, પરંતુ સુરતમાં યોજાયેલા એક લગ્ન પ્રસંગ દરમિયાનનો છે.

અમે મિત્રો અને કાર્યકરો સાથે બેઠા હતા ત્યારે માત્ર મજાક-મસ્તીના મૂડમાં આ બધું બોલાયું હતું.વીડિયોમાં દેખાય છે તેવી કોઈ ગંભીર ઘટના બની નથી.

બીજી તરફ, આ મામલે વિવાદ વધતાં ખાંભા તાલુકા ભાજપ સંગઠનના પ્રમુખ આનંદ ભટ્ટ પણ હરકતમાં આવ્યા છે. તેમણે આ અંગે પ્રતિક્રિયા આપતા જણાવ્યું કે, આ વીડિયો ધારી ગીરના રિસોર્ટનો છે કે અન્ય કોઈ જગ્યાનો તેની સત્તાવાર પુષ્ટિ હજી થઈ નથી. પરંતુ પક્ષના એક જવાબદાર પદાધિકારી તરફથી આ પ્રકારનું વર્તન બિલકુલ યોગ્ય ન કહી શકાય. પક્ષ આ બાબતને અત્યંત ગંભીરતાથી લઈ રહ્યો છે.