DSP ના નિવાસસ્થાને દરોડા, રૂ. 200 કરોડની સંપત્તિ મળી, સોના, ચાંદીના દાગીના, લક્ઝરી ફ્લેટ્સ, વિલા, 50 એકરથી વધુ જમીના પુરાવા મળ્યાં

ACB એ હૈદરાબાદમાં પોલીસ કમ્પ્યુટર સર્વિસીસમાં ફરજ બજાવતા DSP સંકીરેડ્ડી ભીમ રેડ્ડી વિરુદ્ધ ભ્રષ્ટાચાર નિવારણ અધિનિયમ, 1988 (2018માં સુધારેલ) ની કલમ 13(1)(b) અને 13(2) હેઠળ કેસ નોંધ્યો છે. આરોપ છે કે તેમણે પોતાની નોકરી દરમિયાન ભ્રષ્ટાચાર અને ગેરકાયદેસર માધ્યમો દ્વારા આવકના સ્ત્રોત કરતાં વધુ સંપત્તિ ભેગી કરી હતી. તેમના નિવાસસ્થાન તેમજ તેમના સંબંધીઓ, મિત્રો, બેનામીદારો અને સહયોગીઓ સાથે સંકળાયેલા 16 સ્થળોએ દરોડા પાડવામાં આવ્યાં હતા.

ઓળખાયેલી મિલકતોમાં ઇબ્રાહિમ બાગમાં વેસેલા મીડોઝ ખાતે એક વિલા, ટેલિકોમ નગરમાં પેન્ટહાઉસ G+2 ઘર અને બીજો ફ્લેટ  ગચીબોવલીમાં ક્રાંતિ ઝિઓન એપાર્ટમેન્ટ્સ ખાતે એક ફ્લેટ, તેલ્લાપુરમાં બે ફ્લેટ, મણિકોંડામાં લેન્કો હિલ્સ રોડ પર G+5 કોમર્શિયલ કોમ્પ્લેક્સનો એક ભાગ, મણિકોંડામાં મરીચેટ્ટુ જંકશન નજીક 3,000 ચોરસ ફૂટ કોમર્શિયલ જગ્યા, અને નાગોલે, પટણચેરુ, પ્રગતિ રિસોર્ટ્સ અને મોમિનપેટમાં ઘણા ખાલી પ્લોટનો સમાવેશ થાય છે.

તેલંગાણા અને કર્ણાટકમાં જમીન ધારણ અને રોકાણ અંગેની વિગતો પણ સામે આવી છે. ACB એ ઝહીરાબાદ (સાંગારેડ્ડી જિલ્લો) માં 3.5 એકર ખેતીની જમીન, કર્ણાટકમાં 6 એકર અને 38 એકર જમીન, બેંગલુરુ નજીક દેવનાહલ્લીમાં એક એકર, મોમિનપેટ (વિકારાબાદ જિલ્લો) માં બે એકર અને મુચિંતાલા ગામમાં 4.20 એકર જમીન સંબંધિત દસ્તાવેજો જપ્ત કર્યા છે. અધિકારીએ રાઘવેન્દ્ર રોક સેન્ડ મિનરલ્સમાં રૂ. 75 લાખનું રોકાણ કર્યું હતું

દરોડા દરમિયાન, એસીબી (ACB)ની તપાસ ટીમે અધિકારીના નિવાસસ્થાનમાંથી આશરે રૂ. 3.6 લાખ અને બેનામીદાર (પ્રતિનિધિ ધારક)ના ઘરેથી રૂ. 40 લાખની રોકડ રકમ જપ્ત કરી હતી. આ ઉપરાંત, તેમને લગભગ બે કિલોગ્રામ વજનના સોનાના દાગીના, આશરે 20 કિલોગ્રામ વજનની ચાંદીની વસ્તુઓ અને લગભગ રૂ. 19.91 લાખનું બેંક બેલેન્સ પણ મળી આવ્યું હતું. 

એજન્સીને અધિકારીના નિવાસસ્થાનેથી વિદેશી દારૂની 23 બોટલો પણ મળી આવી હતી અને આગળની કાર્યવાહી માટે આબકારી વિભાગને જાણ કરવામાં આવી હતી. અન્ય મિલકતોની ચકાસણી ચાલી રહી છે અને આ મામલે તપાસ ચાલુ છે.