BAPS ના જણાવ્યાં અનુસાર, પ્રતિનિધિમંડળમાં સભ્યોની સંખ્યા ઘણી વધારે હતી. આ જ કારણે એફિલ ટાવરની ટીમ સાથે સંકલન કરીને આ મુલાકાત સામાન્ય લોકો માટે ટાવર ખુલતા જ રાખવામાં આવી હતી, જેથી અન્ય પ્રવાસીઓને ઓછી તકલીફ થાય અને તેમની અવરજવર પ્રભાવિત ન થાય. પ્રતિનિધિમંડળે જણાવ્યું કે તેમની જાણ મુજબ, મુલાકાત દરમિયાન કોઈ પણ સમયે કોઈને પણ એફિલ ટાવરમાં જતાં રોકવામાં આવ્યાં ન હતા.
સોમવારે પેરિસનો એફિલ ટાવર થોડા સમય માટે બંધ રહ્યો હતો. કર્મચારીઓએ એક બેઠક યોજીને વિરોધ પ્રદર્શન કર્યું હતું. આ વિરોધ શનિવારે થયેલી એક મુલાકાત સાથે જોડાયેલો હતો, જેમાં લગભગ 100 લોકોનું હિન્દુ ધાર્મિક પ્રતિનિધિમંડળ એફિલ ટાવર પહોંચ્યું હતું. એવો આરોપ લગાવવામાં આવ્યો હતો કે પ્રતિનિધિમંડળની મુલાકાત દરમિયાન કેટલીક મહિલા કર્મચારીઓને તેમની કામ કરવાની જગ્યા પરથી હટી જવા માટે કહેવામાં આવ્યું હતું અને તેમની જગ્યાએ પુરુષ કર્મચારીઓને તૈનાત કરવામાં આવ્યાં હતા. આ ઘટનાથી કર્મચારીઓમાં ભારે નારાજગી ફેલાઈ હતી.
શનિવારે એફિલ ટાવર પહોંચેલું આ પ્રતિનિધિમંડળ BAPS સાથે સંકળાયેલું હતું. આ જૂથ પેરિસ નજીક બનેલા એક ભવ્ય હિન્દુ મંદિરના ઉદ્ઘાટન સંબંધિત કાર્યક્રમોમાં ભાગ લેવા ફ્રાન્સ આવ્યું હતું. યુનિયનના પ્રતિનિધિઓનું કહેવું છે કે પ્રતિનિધિમંડળની અવરજવર દરમિયાન મહિલા કર્મચારીઓને પોતાની ડ્યુટીની જગ્યા છોડવા માટે કહેવામાં આવ્યું હતું. તેમની જગ્યાએ પુરુષ કર્મચારીઓને મુકવા સામે યુનિયને સવાલો ઉઠાવ્યા હતા અને તેને લઈને કર્મચારીઓમાં આક્રોશ વધતો ગયો. યુનિયનના પ્રતિનિધિ ડાયને ડાવોઇને જણાવ્યું કે આ ઘટનાને લઈને કર્મચારીઓનો ગુસ્સો ધીમે ધીમે વધ્યો હતો અને ભવિષ્યમાં મહિલાઓ સાથે આવો વ્યવહાર થાય તેવી પરિસ્થિતિ ફરી ક્યારેય ન સર્જાવી જોઈએ.
કર્મચારીઓની માંગ છે કે ભવિષ્યમાં કોઈ પણ મહિલા કર્મચારીને માત્ર તેના લિંગ (જેન્ડર)ના આધારે તેની જવાબદારી કે કામના સ્થળેથી પાછળ ન હટાવવામાં આવે. આ બેઠકના કારણે એફિલ ટાવરને સામાન્ય લોકો માટે ખોલવામાં વિલંબ થયો હતો. સ્મારક પર એક નોટિસ ચોંટાડવામાં આવી હતી, જેમાં જણાવાયું હતું કે સંચાલન સંબંધિત કારણોસર એફિલ ટાવર નિર્ધારિત સમયે ખુલી શકશે નહીં. યુનિયનના જણાવ્યાં અનુસાર, મેનેજમેન્ટે આ ઘટના અંગે કર્મચારીઓની માફી માંગી લીધી છે.
એફિલ ટાવરનું સંચાલન કરતી કંપની SETE એ પણ આ વિવાદ પર પ્રતિક્રિયા આપી હતી. કંપનીએ સ્વીકાર્યું કે પ્રતિનિધિમંડળ તરફથી મહિલા કર્મચારીઓ સાથે સંપર્ક ઓછો રાખવાની માંગ કરવામાં આવી હતી. SETE એ જણાવ્યું કે આવી શરતો સ્વીકારવી જોઈતી ન હતી.
