કોંગોમાં ઈબોલાનો કહેર ! સંક્રમિત કેસોની સંખ્યા 2,000 ને પાર, 754 દર્દીઓનાં મોત

સ્વાસ્થ્ય મંત્રાલયના જણાવ્યાં અનુસાર, 753 દર્દીઓ હજુ પણ હોસ્પિટલો અથવા આઇસોલેશન સેન્ટરોમાં દાખલ છે, જ્યારે સારવાર બાદ 366 લોકો સાજા થયા છે. જોકે સંક્રમિત વ્યક્તિઓના સંપર્કમાં આવેલા લોકોને શોધવાનું કામ પડકારજનક છે અને હાલમાં આવા સંપર્કોમાંથી માત્ર 67 ટકાની જ ઓળખ થઈ શકી છે.

વિશ્વ આરોગ્ય સંસ્થા (WHO) અનુસાર, 15 મેના રોજ શરૂ થયેલો રોગચાળો એટલી ઝડપથી ફેલાઈ રહ્યો છે કે આરોગ્ય અધિકારીઓ માટે તેની ગતિ સાથે તાલ મિલાવવો મુશ્કેલ બની રહ્યો છે. પરિસ્થિતિ એવી છે કે 80 ટકા દર્દીઓને ચેપ ક્યાંથી લાગ્યો તે નક્કી કરવું મુશ્કેલ બની રહ્યું છે.

આરોગ્ય અધિકારીઓ સામે સૌથી મોટો પડકાર એ છે કે આ રોગચાળાના પ્રથમ ચેપગ્રસ્ત વ્યક્તિ અથવા દર્દી શૂન્યની હજુ સુધી ઓળખ થઈ નથી. સશસ્ત્ર સંઘર્ષ અને ખાણકામ વિસ્તારોમાં સતત હિલચાલને કારણે લોકોનું સ્થળાંતર પણ ચેપગ્રસ્ત વ્યક્તિઓના સંપર્કોને શોધવાના પ્રયાસોમાં અવરોધ ઉભો કરી રહ્યું છે.

WHO (વિશ્વ આરોગ્ય સંસ્થા) ના આરોગ્ય કટોકટી વિભાગના વડા ડૉ. ચિકવે ઇહેકવેઝુએ જણાવ્યું હતું કે, તાજેતરમાં થયેલા ઘણા મોત એવા લોકોના હતા કે જે સારવાર માટે આરોગ્ય કેન્દ્ર સુધી પહોંચી શક્યા ન હતા. પગાર ન મળવાના વિરોધમાં ઇતુરી પ્રાંતના વિવિધ વિસ્તારોમાં આરોગ્ય કર્મચારીઓ હડતાળ પર ઉતરી ગયા છે. ઘણા કર્મચારીઓનું કહેવું છે કે રોગચાળો શરૂ થયો ત્યારથી તેમને પગાર મળ્યો નથી.

હાલમાં બુંદિબુગ્યો (Bundibugyo) ઇબોલા વાયરસ માટે કોઈ માન્ય રસી કે અસરકારક સારવાર ઉપલબ્ધ નથી. જોકે, ઇતુરી પ્રાંતમાં બે સંભવિત દવાઓના પરીક્ષણ માટે દર્દીઓની નોંધણી શરૂ થઈ ગઈ છે, જેનાથી ભવિષ્યમાં સારવારનો માર્ગ ખૂલવાની આશા જાગી છે.