- 40થી વધુ લોકો ઘાયલ થયા
- 10 ગંભીર લોકોને તાત્કાલિક હોસ્પિટલ ખસેડાયા
પરભણી: મહારાષ્ટ્રના પરભણી જિલ્લામાંથી એક અત્યંત દુઃખદ અને કંપારી છૂટી જાય તેવી ઘટના સામે આવી છે. યશવાડી દેવસ્થાનમાં આવેલા હનુમાન મંદિરના હોલની છત અચાનક તૂટી પડતાં મોટો અકસ્માત સર્જાયો છે. આ ભયાનક દુર્ઘટનામાં અત્યાર સુધીમાં 6 લોકોના મોત થયા છે, જ્યારે 40 જેટલા શ્રદ્ધાળુઓ ઘાયલ થયા હોવાના અહેવાલ છે.
મળતી માહિતી અનુસાર, મંદિરમાં બરાબર સામેના ભાગે સભામંડપ બનાવવાનું કામ ચાલી રહ્યું હતું. શનિવારનો દિવસ હોવાને કારણે મંદિરમાં કીર્તન અને મહાપ્રસાદનું આયોજન કરવામાં આવ્યું હતું, જેમાં મોટી સંખ્યામાં ભક્તો ઉમટ્યાં હતા. બપોરના સમયે જ્યારે શ્રદ્ધાળુઓ હોલમાં બેસીને પ્રસાદ લઈ રહ્યાં હતા, ત્યારે જ અચાનક મંદિરનું આખું માળખું ધસી પડ્યું હતું. આ સમગ્ર ઘટનાના કાળજું કંપાવનારા CCTV ફૂટેજ પણ સામે આવ્યાં છે.
