ઈરાનનો હોર્મુઝમાં બે ટેન્કરો પર મિસાઈલ હુમલો, 1 ભારતીયનું મોત, અન્ય 8 ઘાયલ

ભારતીય નાગરિકનું મોત આવી રીતે થયું 

યુએઈના સંરક્ષણ મંત્રાલયે દાવો કર્યો છે કે ઈરાની ક્રુઝ મિસાઈલોએ તેના જહાજોને નિશાન બનાવ્યાં હતા. યુએઈના જણાવ્યાં અનુસાર, ઈરાની મિસાઈલોએ દક્ષિણ ચેનલમાં બે યુએઈ ટેન્કરો પર હુમલો કર્યો હતો, જેના પરિણામે એક નાવિકનું મોત થયું હતું. ઈરાની ક્રુઝ મિસાઈલોએ ઓમાનીના પાણીમાં દક્ષિણ લેનમાંથી પસાર થઈ રહેલા ટેન્કરો મોમ્બાસા અને બહિયાને નિશાન બનાવ્યા હતા. આ હુમલામાં મોમ્બાસામાં સવાર એક ભારતીય ક્રૂ મેમ્બરનું મોત થયું હતું અને 8 અન્ય ઘાયલ થયા હતા, જેમાંથી ચારની હાલત ગંભીર છે. ઘાયલોમાં છ ભારતીયો અને બે યુક્રેનિયન નાગરિકોનો સમાવેશ થાય છે.

અમને જવાબ આપવાનો અધિકાર છે - UAE

ઈરાની હુમલામાં બંને ટેન્કરોમાં આગ લાગી હતી, જેના કારણે તેમને નુકસાન થયું હતું. આગને બાદમાં કાબુમાં લેવામાં આવી હતી. UAE ના સંરક્ષણ મંત્રાલયે આ હુમલાની નિંદા કરી છે અને તેને આંતરરાષ્ટ્રીય કાયદાનું ઉલ્લંઘન ગણાવ્યું છે. આ બાબત આ ક્ષેત્રની સુરક્ષા અને સ્થિરતા માટે ખતરો ઊભો કરે છે. ઉલ્લેખનીય છે કે, અગાઉ યુએસ પ્રમુખ ડોનાલ્ડ ટ્રમ્પે જાહેરાત કરી હતી કે હવે અમેરિકા સ્ટ્રેટ ઓફ હોર્મુઝનું રક્ષક છે. જહાજોની સુરક્ષા સુનિશ્ચિત કરવાના બદલામાં અમેરિકા અન્ય દેશો પાસેથી 20 ટકા સુરક્ષા ફી વસૂલશે.

યુએઈ (UAE) એ જણાવ્યું છે કે આ તણાવપૂર્ણ પરિસ્થિતિનો જવાબ આપવાનો તથા પોતાના પ્રદેશ, નાગરિકો અને રહેવાસીઓના રક્ષણ માટે તમામ જરૂરી પગલાં લેવાનો તેને સંપૂર્ણ અધિકાર છે. આમ કરવાથી તે પોતાની સાર્વભૌમત્વ, સુરક્ષા અને સ્થિરતા જાળવી રાખશે તેમજ પોતાના રાષ્ટ્રીય હિતોનું રક્ષણ કરશે. તે કોઈપણ ખતરાનો સામનો કરવા માટે સંપૂર્ણપણે સજ્જ છે અને દેશની સુરક્ષા તથા સ્થિરતાને નબળી પાડવાના કોઈપણ પ્રયાસનો યોગ્ય જવાબ આપવા માટે તમામ જરૂરી પગલાં લઈ રહ્યું છે.