ગુજરાતના ખેડૂતો પર અત્યાચાર થશે તો દેશવ્યાપી આંદોલન થશે: રાકેશ ટીકૈત

ખેડૂત મહાસભામાં રાકેશ ટિકૈટે, આંદોલનકારી  ખેડૂતોને પ્રોત્સાહીત કરતું એવુ નિવેદન કર્યું હતું કે, મોરબીમાં ખેડૂતો પર લાઠી ચાલશે તો તે જ દિવસે મુઝફ્ફરનગર, ઉત્તરપ્રદેશ, પંજાબ અને હરિયાણામાં પણ પોલીસ મથકો પર ઘેરાવ કરીને સ્ટેશનને બંધ કરાવાશે.વન નેશન વન ઇલેક્શનની વાત થાય છે તો એક આંદોલન પણ દેશનું વન આંદોલન થશે.

રઘુવીરસિંહ ચૌધરીએ સ્પષ્ટ કર્યું કે બે ગણું વળતર આપીને સરકાર કોઈ અહેસાન નથી કરી રહી. કાયદા હેઠળ 100 ટકા સોલેશિયમ અને બજાર ભાવ મુજબ ચાર ગણું વળતર આપવાની સ્પષ્ટ જોગવાઈ છે. વર્ષ 2013 પછી સરકારે સર્કલ રેટ રિવાઇઝ કરવાનું બંધ કરી દીધું છે, જેથી ખેડૂતોની જમીન સસ્તામાં પચાવી પાડી શકાય.

તેમણે કહ્યું આ જમીન સંપાદન કોઈ જાહેર સાર્વજનિક યોજના માટે નથી, પરંતુ ખાનગી કંપનીઓ માટે થઈ રહ્યું છે. આવી સ્થિતિમાં સરકારે વચેટિયા કે દલાલ બનવાનું બંધ કરવું જોઈએ. ખાનગી ઉદ્યોગપતિ કે કંપની પોતાના વેપારના વિકાસ માટે જમીન માંગતી હોય ત્યારે સરકારે વચ્ચે પડવાની જરૂર નથી. કંપની અને જમીન માલિક ખેડૂતોએ સામસામે બેસીને યોગ્ય બજાર ભાવ તથા 4 ગણા વળતર અંગે સીધો નિર્ણય લેવો જોઈએ.