ટ્રમ્પે જેનરિક દવાઓ પર 200 ટકા સુધીનો ટેરિફ લાદવાની કરી જાહેરાત, ભારતીય કંપનીઓ પર તેની શું અસર થશે ?

તેમણે જણાવ્યું કે આ દવાઓ બે વર્ષ સુધી અમેરિકામાં ડ્યુટી-ફ્રી (કરમુક્ત) આવતી રહેશે, અને ત્યારબાદ ફાર્માસ્યુટિકલ ઉત્પાદનને દેશમાં પાછું લાવવા માટે તેના પર ઊંચો ટેરિફ લાદવામાં આવશે.

2028 પછી 200 ટકા ટેરિફ લાગુ થશે

આ પગલાનો ઉદ્દેશ્ય આવી ફાર્માસ્યુટિકલ દવાઓનું સ્થાનિક ઉત્પાદન શરૂ કરવાનો છે. તેમના ટ્રુથ સોશિયલ પ્લેટફોર્મ પરની એક પોસ્ટમાં તેમણે કહ્યું, 1 ઓગસ્ટ, 2026થી બે વર્ષના સમયગાળા માટે અમેરિકામાં આવતી તમામ જેનરિક દવાઓ પર શૂન્ય ટકા ટેરિફ લાગુ થશે. ત્યાર બાદ, એક વર્ષ માટે ટેરિફ વધારીને 100 ટકા કરવામાં આવશે અને તે પછી તેને વધારીને 200 ટકા કરવામાં આવશે.

અમેરિકનોનું રક્ષણ કરવું, એ મુખ્ય ઉદ્દેશ્ય 

આ નીતિની જાહેરાત કરતી વખતે ટ્રમ્પે જણાવ્યું કે, આ પગલાનો હેતુ કંપનીઓને દેશની અંદર જ જેનરિક દવાઓનું ઉત્પાદન કરવા માટે પ્રોત્સાહિત કરવાનો છે. જેનરિક દવાઓનું ઉત્પાદન ફરીથી અમેરિકામાં લાવવા માટે આ કરવામાં આવી રહ્યું છે. જે કંપનીઓ નિર્ધારિત સમયમર્યાદામાં પ્લાન્ટ અને સાધનો સ્થાપિત કરવામાં નિષ્ફળ જશે, તેમને દંડનો સામનો કરવો પડશે. આ નીતિનો ઉદ્દેશ્ય અમેરિકન લોકોનું રક્ષણ કરવાનો છે.

પેટન્ટ ધરાવતી, બ્રાન્ડેડ અથવા નવી (નવીન) દવાઓ અંગેની નીતિમાં કોઈ ફેરફાર કરવામાં આવશે નહીં, કારણ કે તે સફળ રહી છે. સમગ્ર અમેરિકામાં મોટા સ્તરે ફાર્માસ્યુટિકલ ઉત્પાદન સુવિધાઓનું નિર્માણ થઈ રહ્યું છે.

ગયા વર્ષે અગ્રણી ફાર્માસ્યુટિકલ કંપનીઓએ યુએસ સરકાર સાથે કરારો કર્યા હતા, જેના હેઠળ અબજો ડોલરની કિંમતની દવાઓને ટેરિફમાંથી મુક્તિ આપવામાં આવી હતી. ટ્રમ્પે આયાતી બ્રાન્ડેડ દવાઓ પર પણ ટેરિફ લગાવ્યો હતો, જો ઉત્પાદકો કિંમત સંબંધિત શરતો સ્વીકારે અથવા તે દવાઓનું ઉત્પાદન યુનાઇટેડ સ્ટેટ્સમાં કરવાની ખાતરી આપે, તો તેમને આમાંથી મુક્તિ મળશે.

ભારત પર તેની શું અસર થશે ?

ટ્રમ્પે જણાવ્યા મુજબ, ટેરિફની આ તબક્કાવાર વ્યવસ્થા ખાસ કરીને આંતરરાષ્ટ્રીય ફાર્માસ્યુટિકલ ઉત્પાદકોને એક અંતિમ ચેતવણી (અલ્ટીમેટમ) આપવા માટે તૈયાર કરવામાં આવી છે, તેમણે અમેરિકાના સ્થાનિક માળખાગત માળખામાં રોકાણ કરવું પડશે, અથવા ભારે આર્થિક દંડનો સામનો કરવો પડશે.

આ વધારો વિદેશી નિકાસ કેન્દ્રો, ખાસ કરીને ભારત માટે લાંબા ગાળાનો એક નોંધપાત્ર પડકાર ઊભો કરે છે. યુનાઇટેડ સ્ટેટ્સમાં વપરાતી જેનરિક દવાઓનો આશરે 40 ટકા હિસ્સો ભારતીય ફાર્માસ્યુટિકલ ઉત્પાદકો પૂરો પાડે છે. ભારતને ઘણીવાર વિશ્વની ફાર્મસી (pharmacy of the world) તરીકે ઓળખવામાં આવે છે, કારણ કે અહીં US FDA દ્વારા મંજૂર કરાયેલા 3,,000 થી વધુ ઉત્પાદન પ્લાન્ટ્સ આવેલા છે.

ઓક્ટોબર 2024માં નવી દિલ્હી ખાતે યોજાયેલી USISPF ઈન્ડિયા લીડરશિપ સમિટમાં સંબોધન કરતા કેન્દ્રીય આરોગ્ય સચિવ પુણ્ય સલિલા શ્રીવાસ્તવે જણાવ્યું હતું કે ભારતીય ફાર્માસ્યુટિકલ ઉદ્યોગનું યોગદાન એ હકીકત પરથી સ્પષ્ટ થાય છે કે અમેરિકાની બહાર સૌથી વધુ સંખ્યામાં US FDA-મંજૂર ફાર્માસ્યુટિકલ પ્લાન્ટ્સ ભારતમાં આવેલા છે. અમેરિકાની બહાર આવેલા તમામ US FDA-મંજૂર પ્લાન્ટ્સમાં આ પ્લાન્ટ્સનો હિસ્સો 25 ટકા જેટલો છે.

ભારતીય જેનેરિક દવાઓએ વર્ષ 2022 માં અમેરિકાની આરોગ્યસંભાળ પ્રણાલીના 219 અબજ ડોલર બચાવ્યા હતા અને 2013 થી 2022 દરમિયાન કુલ બચત 1.3 ટ્રિલિયન ડોલર થઈ હતી.