જોર્ડનમાં 2 સૈનિકોના મોતથી અમેરિકા ભડક્યું, ઈરાન પર કરી એર સ્ટ્રાઇક

એક સત્તાવાર નિવેદનમાં સેન્ટકોમ (CENTCOM) એ જણાવ્યું કે, કમાન્ડર-ઇન-ચીફના આદેશ પર, યુએસ દળોએ ઈરાન પર ફરી હવાઈ હુમલાની કાર્યવાહી શરૂ કરી છે. આ હુમલાઓનો ઉદ્દેશ હોર્મુઝની સામુદ્રધુનીમાં વ્યાપારી જહાજો માટે જોખમ ઊભું કરવાની ઈરાનની ક્ષમતાને વધુ નબળી પાડવાનો છે. તેનો હેતુ ઈસ્લામિક રિવોલ્યુશનરી ગાર્ડ કોર્પ્સ (IRGC) ના તે દળોને તાત્કાલિક અને કડક પાઠ ભણાવવાનો છે, જેમણે ગઈકાલે રાત્રે જોર્ડનમાં યુએસ સૈનિકો પર હુમલો કર્યો હતો.

અમેરિકાનો આરોપ છે કે શુક્રવારે રાત્રે જોર્ડનમાં અમેરિકન સૈનિકો પર થયેલા બેલિસ્ટિક મિસાઇલ અને ડ્રોન હુમલા પાછળ IRGCનો હાથ હતો. અમેરિકન સેનાએ જણાવ્યું કે જોર્ડનમાં થયેલા ઈરાની હુમલા દરમિયાન બે અમેરિકન સૈનિકોનાં મોત થયાં હતાં, જ્યારે એક સૈનિક ગુમ છે. ચાર ઘાયલ સૈનિકોને સારવાર માટે હોસ્પિટલમાં લઈ જવામાં આવ્યા હતા. 

સેન્ટકોમે (CENTCOM) જણાવ્યું હતું કે શહીદ થયેલા સૈનિકોની ઓળખ હાલમાં જાહેર કરવામાં આવશે નહીં. તેમના પરિવારોને જાણ કર્યા બાદ જ તેમના નામ જાહેર કરવામાં આવશે. સૈનિકોના મોત પર શોક વ્યક્ત કરતા યુએસ પ્રમુખ ડોનાલ્ડ ટ્રમ્પે કહ્યું, આ અત્યંત દુઃખદ ઘટના છે. તેમણે આપણા દેશની સેવા કરતી વખતે સર્વોચ્ચ બલિદાન આપ્યું છે.

સોશિયલ મીડિયા પર શ્રદ્ધાંજલિ આપતા યુએસ સંરક્ષણ મંત્રી પીટ હેગસેથે લખ્યું, ઈશ્વર બહાદુર સૈનિકોને શાંતિ અર્પે. તેમનું બલિદાન અમારા સંકલ્પને વધુ દ્રઢ બનાવે છે. અમેરિકા દ્વારા કરવામાં આવેલા નવા હવાઈ હુમલાઓને પગલે પશ્ચિમ એશિયામાં તણાવ વધી ગયો છે. નિષ્ણાતોનું માનવું છે કે જો બંને દેશો વચ્ચે સૈન્ય કાર્યવાહી આ રીતે ચાલુ રહેશે, તો સમગ્ર ક્ષેત્ર મોટા સંઘર્ષમાં સપડાઈ શકે છે, જેનાથી વૈશ્વિક તેલ અને વેપાર સંકટ વધુ ઘેરું બની શકે છે.